Qyzylordada táýelsizdik merekesi qarsańynda qalaǵa qarasty Tasbóget kentinde 140 oryndyq «Nur Orda» balabaqshasy, sondaı-aq qala ortalyǵynda «Small» kóterme saýda marketi ashyldy.
Tasbóget kentiniń turǵyndaryn Táýelsizdik kúni merekesimen jáne balabaqshanyń ashylýymen quttyqtaǵan oblys ákimi Q.Kósherbaev:
- Qyzylorda qalasy boıynsha búgingi kúni jalpy sany 237 mektepke deıingi bilim berý uıymy bar. Onyń ishinde memlekettik balabaqsha sany - 26, mektep janynan ashylǵan shaǵyn ortalyq - 6, jeke balabaqsha sany – 205. 2015 jyly 3-6 jas aralyǵyndaǵy búldirshinderdi mektepke deıingi tárbıemen qamtamasyz etýdi merziminen buryn 100 paıyzǵa oryndadyq. Munda memlekettik-jekemenshik áriptestikti damytýdyń arqasynda úlken jumystar atqaryldy. Búgingi kúni balabaqshalardyń 71,2 paıyzy memlekettik-jekemenshik áriptestik negizinde jumys istep tur,-dedi.
Sol kúni Qorqyt Ata kóshesinde «Small» saýda úıi de ashyldy. Munda 12 myńnan astam taýardyń túrleri usynylyp, 134 adam turaqty jumyspen qamtyldy. Sóz reti kelgende aıta keteıik, bul - Qyzylordada «Small» saýda jelisiniń tórtinshi dúkeni. Jyl basynan beri oblys ortalyǵynda 67 kásipkerlik nysan ashylyp, onda 1219 jańa jumys orny qurylǵan.
Baqtııar TAIJAN,
«Egemen Qazaqstan»