Qazaqstan BUU Qaýipsizdik Keńesiniń Sırııaǵa transshekaralyq gýmanıtarlyq kómek kórsetýdi jalǵastyrý týraly qararyn qoldady.
BUU Qaýipsizdik Keńesiniń músheleri halyqaralyq qoǵamdastyq pen BUU-nyń Astana prosesi aıasyndaǵy kúshterin qosa alǵanda Sırııadaǵy daǵdarysty retteýde kúshterin joǵary baǵalady. Qabyldanǵan qararda Astana formatyndaǵy kelissózder ustalǵan adamdardyń, ásirese áıelder men balalardyń tez arada bosatylýyna, sondaı-aq qaıtys bolǵandardyń máıitin tapsyrýǵa, joǵalǵan adamdardy anyqtaýǵa eleýli úles qosatynyn atap ótti.
Qararǵa sáıkes BUU Qaýipsizdik Keńesi «barlyq taraptar BUU-nyń Sırııadaǵy qajettilikterin keńinen baǵalaý negizinde barlyq suralǵan aýdandarǵa jáne halyqtyń barlyq toptaryna BUU-nyń gýmanıtarlyq jasaqtary jáne onyń oryndaýshy seriktesteri úshin, sonyń ishinde dári-dármekter men hırýrgııalyq jabdyqtardy qaýipsiz, kedergisiz jáne turaqty qol jetimdilikti qamtamasyz etýin talap etedi».
Qazaqstan Respýblıkasynyń BUU janyndaǵy Turaqty ókili Qaırat Omarov kezdesý barysynda Qazaqstan Sırııadaǵy gýmanıtarlyq uıymdardyń, sonyń ishinde BUU agenttikteri men ÚEU-nyń qyzmetin qoldaıtyndyǵyn atap ótti. «Biz úkimet baqylaýyndaǵy, úkimetpen baqylanbaıtyn aýmaqtarda barlyq adamdarǵa kómek kórsetýde gýmanıtarlyq beıtaraptylyq pen ádilettilik prınsıpterin saqtaýdyń mańyzdylyǵyn atap ótemiz», - dedi elshi.
Qazaqstan Iordanııa men Túrkııadan Sırııaǵa gýmanıtarlyq kómek kórsetýdi qaıta jandandyrý men ony ulǵaıtýdy qoldady. Sonymen qatar, BUU-nyń gýmanıtarlyq mıssııalaryna qaýip tóndiretin terrorıstik uıymdardyń arandatý áreketterine alańdaýshylyq bildirildi.
Sondaı-aq, Q. Omarov BUU-nyń Bosqyndar isi jónindegi joǵarǵy komıssar basqarmasy jáne Halyqaralyq Qyzyl Krest Komıteti ókilderiniń 28-29 qarashada Astana qalasynda ótken Sırııa jónindegi kelissózine qatysýyn qoldady. Astana formatyndaǵy ótken kezdesý osy eldegi beıbit kúshterdi nyǵaıtýǵa jáne halyqtyń azaptaryn joıýǵa baǵyttalǵandyǵyn atap ótti.
BUU Qaýipsizdik Keńesiniń otyrysynda BUU Bas hatshysynyń gýmanıtarlyq máseleler jónindegi orynbasary Mark Loýkoktyń baıandamasy tyńdaldy. О́z baıandamasynda ol 13 mıllıon adamnyń gýmanıtarlyq kómekke muqtaj ekenin, onyń ishinde 3 mıllıonnan astam adamǵa jedel kómek qajettigin atap ótti. Rýkban lagerinde turatyn 40 myń adamnyń jaǵdaıy turaqty túrde gýmanıtarlyq kómek kórsetýdi talap etedi. 2018 jylǵy qańtar-qyrkúıek aralyǵynda BUU men onyń gýmanıtarlyq áriptesteri aı saıyn úsh mıllıon adamǵa kómek kórsetti. Jalpy alǵanda, BUU men onyń gýmanıtarlyq áriptesteri kómekke muqtaj adamdardyń 40 paıyzyna kómek kórsetti.