«Otandastar» Qory Prezıdenti Nurtaı Ábiqaev pen Dúnıejúzi qazaqtar Qaýymdastyǵy (DQQ) Tóraǵasynyń birinshi orynbasary Zaýytbek Turysbekov belgili kásibı boksshy, birinshi orta salmaqtaǵy WBA Fedecaribe, WBA Fedelatin jáne WBA InterContinental, WBO NABO, WBO Intercontinental tıtýldyq ataqtarynyń ıegeri Qanat Islammen kezdesti.
Kezdesý barysynda Nurtaı Ábiqaev 16 jeltoqsanda Astana qalasynda Qanat Islam qurǵan promoýterlik kompanııa uıymdastyryp jatqan kásipqoı boks keshiniń sátti ótýine tilek bildirdi. Týrnırdiń basty kezdesýi – sportsúıer qaýymǵa «Qazaq batyry» degen laqap atpen belgili qytaılyq qandasymyz Elshat Nyǵymetollaulynyń WBC ASIA chempıondyq tıtýly úshin jekpe-jegi eken. Qanat Islamnyń aıtýynsha, bul Elshattyń tarıhı Otanynda alǵash ret judyryqtasýy bolmaq.
Nurtaı Ábiqaev Qanat Islamǵa Elbasy tapsyrmasymen sheteldik jáne elge oralǵan qandastardy qoldaýǵa baǵyttalǵan «Otandastar» Qorynyń maqsat-mindetterin tanystyryp, aldaǵy jylǵa josparlarymen bólisti. Qordyń basshysy áıgili sportshyny ortaq múdde turǵysynda eńbek pen kúshti biriktirýge shaqyrdy.
«Otandastar» Qorynyń qazirgi maqsaty – jastarmen tyǵyz jumys isteý. 2019 jyldy Elbasymyz Jastar jyly dep jarııalady. О́z kezeginde, barsha qazaq jastary ózińdi aǵa dep biledi, erek syılaıdy. Olarǵa el múddesin joǵary qoıǵan ustanymyńmen, ómirlik tirshiligińmen, sporttyq jolyńmen, adamgershilik qundylyqtardy nasıhattaýyńmen, salaýatty kózqarasyńmen úlgisiń. Qazaqtyń kók týyn bıikke áýeletip júrgen azamatsyń. Elbasy aıtqan ulttyń birigýi turǵysynda da álemniń túkpir-túkpirinde tarydaı shashylǵan qandastarymyzdy bir shańyraqtyń astynda uıystyryp jatqan eńbegiń orasan. Bizdiń «Otandastar» Qorynyń ózińdeı azamattarmen múddelerimiz ortaq. Sondyqtan osy baǵytta kúshimizdi biriktirsek, birge eńbek etsek, alynbaıtyn tóbe, baǵynbaıtyn qamal joq dep bilemin», dedi «Otandastar» qorynyń prezıdenti Nurtaı Ábiqaev.
Dúnıejúzi qazaqtary qaýymdastyǵy Tóraǵasynyń birinshi orynbasary Zaýytbek Turysbekov belgili boksshy, álem chempıony Qanat Islamǵa Qaýymdastyqtyń múshelik bıletin tabystady.
«Otandastar» deıtuǵyn Qor tek qazaqtar emes, kóńili Qazaqstanǵa buryp turatyn dúnıe júzindegi barsha azamattardyń Qory deýge negiz bar. Endi ǵana táı-táı basyp jatqan uıym. Maqsatymyz ortaq bolǵandyqtan, óziń de úles qosady dep senemiz. Sebebi jastardyń arasynda sendik abyroı óte bıik. Boksshylar álemde az emes, biraq jastar arasyndaǵy biregeıi kim degende, birinshi bolyp ózińniń atyń atalady. Qanat baýyrymmen bul kezdesýdi – tarıhı kezdesý dep bilem», dedi Zaýytbek Turysbekov.
Qanat Islam oryn alǵan kezdesý men DQQ múshesi ataǵy úshin alǵysyn bildirip, óz kezeginde Táýelsizdik kúnine oraı Astanada ótetin boks keshi týraly aıtyp berdi. Týrnırdiń uıymdastyrýshysy – Qanat Islam qurǵan «Qazaq promotions» promoýterlik kompanııasy. Boksshynyń aıtýynsha, reıtıngilik upaılar úshin alys-jaqyn shetelderden kelgen qarsylastarmen Aıdar Sharybaev, Ashat Ýalıhanov, Abylaıhan Qusaıynov, Rýslan Myrsataev syndy qazaqstandyqtar judyryqtasatyn bolady. «QAZAQ PROMOTIONS» kompanııasy Amerıkanyń iri promoýterlik kompanııalarymen birlesip, aýqymdy boks keshterin uıymdastyrýmen aınalysady. Shetelde bıylǵy kóktemde ǵana ashylǵanymen, Qazaqstanda kompanııa eki jyldan beri jumys istep keledi.
«Osyndaı aýqymdy boks keshteriniń arqasynda qanshama qazaq boksshylary el aldyna shyǵyp, ónerin kórsete alady. Inilerimniń de judyryqtasyp, tanylyp, talaı belesti baǵyndyrýyn qalaımyn. Promoýterlik kompanııamnyń negizgi maqsaty da osy. Múmkindik barda, jastardy qoldaý kerek dep esepteımin», dedi Qanat Islam.