Shymkentte el Táýelsizdiginiń 27 jyldyq merekesine oraı balalarǵa arnalǵan sporttyq oıyn alańshalary ashyldy. Saltanatty sharǵa qatysqan qala ákimi Ǵabıdolla Ábdirahymov turǵyndardy merekemen quttyqtap, osynaý qasterli kúnniń mańyzyna toqtaldy.
Jańa nysannyń alǵashqysy Gagarın kóshesinde ornalasqan. N141, 141a kóp qabatty turǵyn úılerdiń aýlasy abattandyrylyp, jańa keıipke endi. Atalǵan turǵyn úılerdiń aýlasynda buqaralyq sportpen shuǵyldanýǵa arnalǵan jattyǵý alańshasy men balalar oıyn alańy paıdalanýǵa berilip otyr. Qurlysty "Aısana-Pırman" JShS júrgizgen.
Ekinshi merekelik tartý "Nursát" shaǵynaýdandaǵy kóp qabatty turǵyn úılerdiń aýlasynda jalǵasyn tapty. «Nursát» shaǵynaýdanynyń №11, 12, 75 kóp qabatty úıler aýlasynda ashyq sport jáne balalar oıyn alańshalarynyń saltanatty ashylý rásimi ótkizilip, turǵyndar ıgiligine paıdalanýǵa berildi. Aýdan ákimi apparaty usynysymen «Nursát» shaǵynaýdanyndaǵy tozyǵy jetken 36 kóp qabatty turǵyn úı ornalasqan 14 aýlany abattandyrýǵa qala bıýdjetinen 293 mln. teńge qarjy bólingen. «Nursát» shaǵynaýdanyndaǵy tozyǵy jetken kóp qabatty turǵyn úıler aýlalaryna zamanaýı úlgidegi balalar oıyn alańshalary jáne sporttyq jattyǵý elementteri ornatyldy. Qurylys jumystary atalǵan shaǵynaýdannyń 36 kóp qabatty úıler aýlalarynda júrgizildi. Onyń ishinde: Báıdibek bı dańǵylynda ornalasqan – 8 úı, Nazarbekov kóshesindegi – 16 úı, Astana dańǵyly boıyndaǵy – 12 úı. Aýlalardy abattandyrý jumystary barysynda 36 kóp qabatty turǵyn úıdiń ıaǵnı, 927 páterde qonystanǵan 5 000-ǵa jýyq turǵyn balalar oıyn alańshalary jáne sporttyq jattyǵý elementterimen qamtyldy. Sonymen qatar, «Nursát» shaǵynaýdany № 11, 12, 75 kóp qabatty turǵyn úıler aýlasyna zamanaýı úlgidegi ashyq sport alańshasy salyndy.
Shara barysynda qala ákimi Ǵabıdolla Ábdirahymov balǵyndarǵa sporttyq buıymdar syıǵa tartty.
Nurshat TО́KEN,
«Egemen Qazaqstan»