Árbir sýreti bir áńgimege tatıtyn qyzylordalyq áriptesimiz Bolat Omarálıevtiń fototilshilik ómirinde ózine de qadirli kadrlar jetkilikti. Baıyrǵy kózmergen shyǵarmashylyq qorjynynan 1985 jyly túsirilgen kórkem qazaqtyń sýretin jarq etkizip shyǵarǵanda, áleýmettik jelide keshegi qazaq velosıpedshilerinen shyqqan tuńǵysh álem jáne KSRO chempıonyn birden jyǵa tanyǵan búgingi zamannyń adamy az boldy. Jastar jaǵy 1985-1990 jyldarda Keńes Odaǵynyń 5 dúrkin chempıony bolǵan sportshyny tipti bilmeıtin bolyp shyqty.
Eger kez kelgen salada óz bıigine kóterilgen ǵajaıyp talanttar op-ońaı esten shyǵyp, eren tabystary osylaısha ýaqyttyń enshisinde tárk etiletin bolsa, ómirzaıa degen osy bolar?! О́ıtkeni 1989 jyly Fransııada ótken álem chempıonatynda kúlli álemdi moıyndatqan Marat Satybaldıevtiń jeńisterin qaıtalaǵan qazaq velotrekshisi bar ma? Sondyqtan da bul sýret búgingi aıdarymyzǵa suranyp-aq tur.
Ekinshiden, sportshynyń jerlesi, bir boıyna talaı qabilet qonaqtaǵan aıtysker aqyn, kompozıtor, estrada ánshisi Elena Ábdiqalyqova bul týraly: «Bir jyldary Qyzylorda oblystyq ákimdigine «Osy Marat Satybaldıev degen chempıon jerlesimiz bar. Nege elge shaqyryp, jastarǵa kórsetip, kezdesý ótkizbeısińder?» degenimde ákimdiktegiler tanymaımyz dedi» dep taýsyla jazdy...
Aıtqandaı, sportshynyń aıtýynsha, anyǵynda ol Soltústik Qazaqstan oblysy, Polýdınsk aýdany, Gavrıno aýylynda dúnıege kelgen. Ákesi Qýanbaı áskerı adam eken. Anasy Zaǵıpamen birge sol kezde Petropavlda qyzmet istep, Marattyń úsh jasynda olar Qyzylordaǵa qaıta kóship kelgen.
Qaı dodaǵa salsań top jaratyn qarymy jetkilikti Qýanbaı men Zaǵıpanyń erek týǵan balasy Keńes Odaǵynyń chempıonattarynda da aldyna júırik salmaǵan. Eger 1985-1990 jyldary alyp derjavada 286 mıllıon halyq bar ekendigin, KSRO-da sol kezeńde 10 myńǵa jýyq velosıpedshi bolǵanyn aıtsaq, onda tuńǵysh Álem chempıony atanǵan qazaqtyń baıraǵy odan ári bıikteı bermek.
«...Onyń álem chempıony atanǵan kezindegi kóńil kúıimizdi tilmen jetkizý qıyn. 1989 jyly tamyzdyń 20-synan 21-ine qaraǵan túni uıqyda maza bolǵan joq. Tań bozynan teledıdarǵa telmirip, radıoǵa qulaq túrýmen boldym. Áli esimde, tańǵy saǵat 7-den 9 mınýt óte bere Máskeýdiń ortalyq teledıdarynan Marat baýyrdyń álem chempıony atanǵanyn estidim. Kóz sharasyna ystyq jas irkildi. Tar ǵana páter baıtaq daladaı keńip sala berdi. Qoıyn dápterdegi: «1989 jyly tamyzdyń jıyrmasynshy juldyzynda qurdasym Marat Satybaldıev velosıpedtiń sońyna túsken qazaq jastarynan birinshi bolyp álem chempıony atandy...» degen jazý áli kúnge deıin ystyq kórinedi», deıtin tanymal sport jýrnalısi Qydyrbek Rysbektiń esteliginen attap ta óte almaısyń, artyq ta aıta almassyń.
Árıne, munshama tabysty memleket ataýsyz, qurmetsiz qaldyrǵan joq. On bes jyl boıy jarys joldarynda júrdi. Biraq 1991 jyly sportty doǵarǵan Marat Qýanbaıuly ári-sári kúı keshe júrip, kúnkóristiń qamymen táýekelge basty, taýar tasydy. Keıin bıznestiń bel balasyna aınaldy. Qalaı bolǵanda da baıyrǵy sportshy ulttyń maqtanyshy bolyp qala beredi.
Aınash ESALI,
«Egemen Qazaqstan»
ALMATY