Almatyda voleıboldan erler arasynda «Býrevestnık kýbogy» dep atalatyn halyqaralyq týrnır aıaqtaldy.
Kezinde «Býrevestnıktiń» dańqy tórtkúl dúnıege tarady. Áıgili voleıbolshy, ataqty bapker Oktıabr Jarlyqapovtyń uıytqy bolýymen alpysynshy jyldary Almaty qalasynda irgetasy qalanǵan komanda qysqa ǵana merzim aralyǵynda óziniń myqtylyǵyn moıyndatty. Atap aıtsaq, 1965 jyly óz tarıhynda tuńǵysh ret KSRO chempıonatynyń «A» tobynda kúsh synasý qurmetine ıe bolǵan jerlesterimiz alǵashqy maýsymda 8 orynǵa taban tirese, kelesi jyly 4 satyǵa jaıǵasty. 1967 jyly júldegerler sanatyna qosylyp, qola medaldi ıelense, 1968 jyly taǵy bir saty joǵarylap, kúmiske júldege qol sozdy. 1969 jyly Qazaqstannyń voleıbolshylary ózderiniń tarıhı jeńisine qol jetkizdi. Sol maýsymda kil myqtylardyń barlyǵyn qapy qaldyrǵan «Býrevestnık» aıdy aspanǵa bir-aq shyǵaryp, KSRO chempıony atandy.Al 1970-1971 jyldary qatarynan eki márte Eýropa chempıondary kýbogyn oljalap, álemdegi eń úzdik komandalar sanatyna qosyldy. Eki retinde de jerlesterimiz aqtyq aıqasta Chehoslovakııanyń ataǵy alysqa jaıylǵan «Zetor Zbroıovka» klýbyna san soqtyrdy.
Mine, sol dańqty komandanyń qurmetine ótken jarysta bıyl Almatynyń «Býrevestnıgi» top jardy. Jerlesterimiz Qyrǵyzstan men О́zbekstannyń ókilderin 3:0 jáne Túrkimenstannyń komandasyn 3:1 esepterimen utyp, reseılikterge 2:3 esebimen ese jiberdi. Nətıjesinde eń kóp upaı jıǵan almatylyqtar birinshi oryn alsa, ekinshi jəne úshinshi oryndy Túrkimenstan men Reseı komandalary ıelendi.
Almatynyń turǵyndary voleıboldy óte jaqsy kóretini barshaǵa málim. Osy jarysty tamashalaý úshin de sport keshenine jankúıer kóptep jınalyp, bizge únemi qoldaý kórsetip otyrdy. Bıylǵy dodada tórt komanda bir deńgeıde óner kórsetti. Tek qana qosalqy quramdaǵy oıynshylarǵa arqa súıegen Qyrǵyzstannyń komandasy ǵana əlsizdeý boldy. Al Məskeý oblysy men Túrkimenstan voleıbolshylary arasyndaǵy tartys úsh jarym saǵatqa sozyldy. Osynyń ózinen-aq týrnırdiń qanshalyqty shıelensti bolǵanyn ańǵarýǵa bolady, – deıdi "Býrevestnık" klýbynyń prezıdenti Amankeldi Shabdarbaev.
Ǵalym SÚLEIMEN,
«Egemen Qazaqstan».
ALMATY