Dzıýdoshylardyń bıylǵy maýsymdaǵy eń sońǵy jarysy – Qytaıdyń Gýanjoý qalasynda ótken «Masters» týrnırinen keıin álemdik reıtıngte biraz ózgerister boldy. Bizder úshin eń qýanyshty jaıt, 2018 jyldyń qorytyndysy boıynsha Qazaqstannyń alty óreni «TOP-10» balýannyń qataryna endi.
Álemdik reıtıngte eń úzdik 16 balýannyń ǵana qatysýymen ótken «Masters» týrnırinde elimizdiń qos dzıýdoshysy qola medalǵa qol jetkizip, óz jankúıerlerin bir qýantyp tastady. Olar – Eldos Smetov pen Islam Bozbaev. Sonyń nátıjesinde ekeýiniń de jaǵdaıy jaqsaryp, úzdikter tiziminde olar birneshe satyǵa joǵarlady. Atap aıtsaq, osyǵan deıin 2 765 upaımen 13-orynda turǵan 60 kılo salmaqtaǵy Smetov 7-orynǵa kóterildi. Qazirgi kezde onyń enshisinde 3 665 upaı bar. Al 90 kılo salmaqtaǵy Bozbaev Gýanjoýdaǵy jarysqa deıin 2 718 upaımen 15-orynǵa jaıǵassa, bul kúnderi ol 9 oryndy ıelenýde. Onyń qorjynynda 3 518 upaı bar.
Búgingi tańda Qazaqstannyń balýandary arasynda eń úzdik nátıje Ǵusman Qyrǵyzbaevqa tıesili. 60 kılo salmaq dárejesinde baq synap júrgen qandasymyz 6-oryndy (3 844 upaı) oljalaýda. Sondaı-aq, «TOP-10» dzıýdoshynyń qatarynda Erlan Serikjanov (66 kılo) pen Jansaı Smaǵulov (73 kılo) bar. Olardyń ekeýi de 10-oryndy ıemdenýde. Dáp qazir Serikjanov 3 400 upaıdy, al Smaǵulov 3 238 upaıdy ıelenýde. Mine, erlerdiń álemdik reıtıngisindegi eń úzdik bes jerlesimiz osylar.
Bıyl «TOP-10» balýannyń sanatyna ene almaǵanymen, kelesi jyly myqtylar qatarynan kórinýge Eldos Jumahanov (66 kılo) pen Dıdar Hamzanyń (81 kılo) múmkindigi mol. Qazirgi kezde 3 085 upaıy bar Jumahanov 11-orynda tursa, 2 586 upaıǵa qol jetkizgen Hamza 14-satyǵa taban tiredi.
Áıelder saıysynda Qazaqstannyń dzıýdoshylary arasynan tek asa jeńil salmaqtaǵy Otgonseseg Galbadrahtyń ǵana aıaqalysy táýir. Bul kúnderi ol 3 700 upaımen 9-oryndy enshileýde. О́zge qyzdarymyzdyń qarqyny tym baıaý.
Álemdik reıtıngte erler arasynda Grýzııanyń qos dzıýdoshysy kósh bastap tur. Olar – Varlam Lapartelıanı (100 kılo) men Gýram Týshıshvılı (+100 kılo). О́zge salmaq dárejelerinde reseılik Robert Mshvıdobadze (60 kılo), japonııalyq Hıfýmı Abe (66 kılo), koreıalyq An Shangrım (73 kılo), ırandyq Saıd Mollaeı (81 kılo) jáne ıspanııalyq Nıkoloz Sherazadvıshvılı (90 kılo) shashalaryna shań juqtyratyn emes.
Áıelder reıtınginde Japonııa men Fransııanyń tegeýirini kúshti. Kún shyǵys eliniń Sýkasa Ioshıda (57 kılo) men Shızýrý Araı (70 kılo) syndy arýlary aldaryna jan salmasa, fransýzdar qatarynan Amandın Bıýshar (52 kılo) men Klarıss Agbenenýdiń (63 kılo) asyǵy alshysynan túsýde. Sondaı-aq, ýkraınalyq Darııa Beloded (48 kılo), gollandııalyq Gıýshe Stenheıs (78 kılo) jáne kýbalyq Idalıs Ortıstiń (+78 kılo) óz qarsylastaryna qaraǵanda shoqtyǵy áldeqaıda bıik.
Ǵalym SÚLEIMEN,
«Egemen Qazaqstan»