Shymkentte Táýelsizdik merekesine oraı qala ákimdiginiń uıymdastyrýymen BAQ ókilderi arasynda «Táýelsizdik – tiregim» atty shaǵyn fýtboldan respýblıkalyq týrnır ótti. Qala ákiminiń kýbogyna arnalǵan saıysty Shymkent qalasy ákiminiń birinshi orynbasary Qaırat Nurtaı resmı túrde ashyp, teńbil dop dodasyna qatysýshylardy Táýelsizdik kúnimen quttyqtady. Ári shyǵarmashylyqpen qatar salaýatty ómir saltyn ustanyp júrgen tilshiler qaýymyna sáttilik tiledi.
Shymkenttiń elimizdiń úshinshi mıllıondy qalasy atanýyna oraı tuńǵysh ret ótken respýblıkalyq týrnırge Astana, Almaty, Shymkent pen Jambyl, Túrkistan, Qyzylorda, Batys Qazaqstan oblystarynyń jýrnalısterinen quralǵan 13 komanda qatysty.
El táýelsizdiginiń 27 jyldyǵyna oraı BAQ ókilderi arasynda jalaýyn kótergen fýtbol alamanyna 2 mıllıon teńgege jýyq qarjylaı júlde qoıyldy.
3 topqa bólingen 13 komanda arasynan kil myqtylar iriktelip shyǵyp, jartylaı fınalynda Almatylyq «Alaman» jəne «Aport» komandalary kezdesti. Nátıjesinde 3-1 esebimen «Alaman» komandasy jeńiske jetti.
Al, ekinshi jartylaı fınaldyq kezdesýde Qyzylordadan kelgen «Aqmeshit» jáne «Habar» telearnasynyń Astana komandasy kezdesip, 1-5 esebimen «Habarlyqtar» basym tústi.
Fınalda «Alaman» jáne «Habar Astana» komandalary kim myqtyny anyqtady. Asa tartysty ótken kezdesý 0:1 esebimen «Habar Astana» komandasynyń paıdasyna sheshildi.
Sonymen, «Habar Astana» komandasy shaǵyn fýtboldan BAQ ókilderi arasynda Shymkent qalasy ákiminiń Kýbogy úshin ótken respýblıkalyq týrnırde jeńiske jetip, 1 mıllıon teńgeniń júldesin utyp aldy. Jarys jeńimpazdaryn Shymkent qalasy ishki saıasat jáne din isteri basqarmasynyń basshysy Murat Bazarqulov marapattady.
«Shymkent Aqparat» JShS dırektory, «Shymkent kelbeti - Panorama Shymkenta» gazetteriniń bas redaktory Aıgúl Qapbarova jekelegen fýtbolshylardy arnaıy nomınasııalarmen marapattady. Olar:
Úzdik shabýylshy - Berik Ýálı (Jambyl oblysy);
Úzdik oıynshy - Oljas Kýlteshov (Almaty oblysy, «Sport 59» komandasy);
Úzdik qorǵaýshy - Esenjol Elekenov (Oral qalasy);
Úzdik qaqpashy – Almas Manap («Egemen Qazaqstan» gazeti). Nomınasııa ıelerine 25 myńnan qarjylaı júlde berildi.
Nurshat TО́KEN,
«Egemen Qazaqstan»