Almatyda qazaqtyń aıaýly aqyn qyzy, Memlekettik syılyqtyń laýreaty Farıza Ońǵarsynovaǵa arnalǵan eskertkish taqta ornatyldy. Mármár taqta Shevchenko men Zenkov kósheleriniń qıylysyndaǵy kezinde qalamger turǵan úıdiń qabyrǵasynan oryn alǵan.
Farıza aqyn «О́leń seni aıalap ótem» deıtin jyr álemindegi áıgili konsepsııasyn Almatyda júrip órnektedi. Sondyqtan da órshil aqyndy Almatymen baılanystyratyn dúnıe kóp-aq. Qala ákimdiginiń tikeleı qoldaýymen qoıylǵan osynaý memorıaldy taqtany búgingi urpaqtyń aǵa býynǵa kórsetken qurmeti dep túsingen jón. Kózi tirisinde-aq halqynyń mahabbatyna bólenip, poezııa padıshasy atanǵan aıaýly aqynnyń sezimge toly sáýleli jyrlary oıly oqyrmanyn jyr besiginde terbetip keledi. Qala ákiminiń orynbasary Arman Qyryqbaev ashyp bergen saltanatty rásimde aqynnyń otty jyrlary oqylyp, qalamdas inileriniń jyly estelikteri aıtyldy.
– Besigin Atyraýdyń aq tolqyndary terbegen Farıza Ońǵarsynova Almatyǵa kelip óziniń ónermen, óleńmen tabysqan, halyqtyń ǵumyrbaıanyna kirgen jańa ómirin bastady. Ońǵarsynovanyń atyn ańyzǵa aınaldyrǵan dastandary, ardaqty týyndylarynyń barlyǵy derlik arý Almatyda kindigin kesti. Bul qala onyń búkil jastyq shaǵyna, abyroıyn asqaqtatqan syrly sátterge kýá. Farıza óleń qyzdar poezııasy nemese erler poezııasy dep bólinbeıtinin, munda tek uly daryndardyń dańǵyly bolatynyn dáleldep ketken jan. Urpaqqa mura bolatyn bul ıgi isti búkil qazaq jyryna jasalǵan qurmet dep esepteımin, – deıdi memleket jáne qoǵam qaıratkeri, aqyn Nurlan Orazalın.
Arman OKTIаBR,
«Egemen Qazaqstan»
ALMATY