Túrkistanda qazaqtyń kórnekti aqyny, jazýshy, ádebıet synshysy Táken Álimqulovtyń 100 jyldyǵy men jazýshy - dramatýrg Asqar Súleımenovtiń 80 jyldyǵyna arnalǵan «Qarataýdyń tól perzentteri» atty eske alý keshi ótti.
Ádebı is-sharada Túrkistan oblysynyń ákimi Janseıit Túımebaevtyń sózin orynbasary Málik Otarbaev oqyp berdi. «Elbasy Nursultan Nazarbaev «Bolashaqqa baǵdar: rýhanı jańǵyrý» jáne «Uly dalanyń jeti qyry» atty baǵdarlamalyq maqalalarynda ulttyq tamyrǵa tereń boılap, elimizdiń qaıratkerleri men uly esimderin dáripteý máselesine de toqtaldy. Bul rette ultymyzdyń rýhanı áleminde óshpes iz qaldyrǵan Teriskeı eliniń týma talant ıeleri — kórnekti ádebıetshiler hám dańqty qalamgerler Táken Álimqulov pen Asqar Súleımenovtiń alar orny erekshe. Teriskeıden túlep ushqan talant ıelerine, ulttyq ádebıetimizdegi oıyp alar orny bar biregeı ókilderin jas urpaqqa nasıhattap, esimderin ulyqtaý — barshamyzdyń paryzymyz», - delingen oblys ákiminiń is-sharaǵa qatysty joldaǵan sózinde. Al Qazaqstan Jazýshylar Odaǵy basqarma tóraǵasynyń orynbasarlary Baqyt Bedelhan men Esenǵalı Raýshanov el súıispenshiligine bólengen qos qaıratker týraly aqjarma tilekterin jetkizdi, shyǵarmashylyqtaryna toqtaldy. Ádebıet synshysy, fılologııa ǵylymynyń doktory Qulbek Ergóbek jazýshy Táken Álimqulovtyń aqyndyq qyrynyń qupııasyna úńildi. Sondaı-aq jazýshy Marhabat Baıǵuttyń estelikteri kópshilikti bir serpiltip tastady. Jıynǵa Tákenniń jary Esimgúl apa, A. Súleımenovtiń uly Álisher qatysty.
Eske alý keshi barysynda sóz alǵandar qazaq ádebıetiniń klassık jazýshysy atalǵan Táken Álimqulovtyń qalamynan shyqqan týyndylardyń qaı-qaısysyn alǵanda qarapaıym qazaqtyń beınesin, ulttyq bolmysy men minezin, tirshiligi men psıhologııasyn anyq kórýge bolatynyn, astarlap jazýdyń sheberi, sırek talant ıesi, daraboz sýretker ekenin atap ótti. Áýeli aqyn retinde tanylǵan Táken Álimqulov tól ádebıetimizdiń qaınarynan, arǵy-bergi shetel ádebıetinen sýsyndaı júrip ádebıet synyna, odan soń prozaǵa at basyn burdy. Tilge degen kózqarasty jazýshy ádebı syn maqalalarynda, zertteýlerinde únemi baıqatyp otyrdy. Shyǵarmalarynda til tazalyǵymen kúı óneriniń qasıetin erekshe baǵalady jáne eńbekterine arqaý etti. Táken Álimqulovtyń «Kók qarshyǵa», «Qaraoı», «Telqońyr», «Jumbaq jan» syndy eńbekteri shoqtyǵy bıik, daryny men jazýshylyq bolmysyn aıshyqtaı túsken erekshe dúnıeler. Sondaı-aq jazýshy kúıdi jáne kúıshini prozada teńdesiz sýretkerlikpen aıshyqtady.
Sozaq aýdanynan shyqqan - sóz qulagerleriniń taǵy biri Asqar Súleımenovtiń prozalyq týyndylary, tereń taldaýlarǵa qurylǵan synı shyǵarmalary, shabytty sátteri men ishki tolqynysyn pash etetin dúnıeleri oqyrmandary joǵary baǵalaǵan qundy mura bolyp qaldy. Onyń dramatýrgııasy men shyǵarmalary ózindik daralyǵymen, tereńdigimen, kórkemdik deńgeıimen, jazylý úlgisimen erekshelenedi. Jazýshynyń ósip-óngen jeriniń mártebesin parasat bıigine kótergen «Sozaq – qarııa, Sozaq – óner, Sozaq – minez», - degen tereń maǵynaly teńeý sózderi búginde óńirdiń ózindik bir uranyna aınalyp otyr.
Aıta ketelik, búginde Sozaq aýdany, Sholaqqorǵan aýylyndaǵy lıseı-ınternat Táken Álimqulovtyń esimimen atalady. Táken Álimqulovtyń 100 jyldyǵyna oraı, Túrkistan qalasyndaǵy №21 jalpy orta mektebine Táken Álimqulovtyń atyn berý jóninde Prezıdent Ákimshiligine usynys hat joldanǵan. Al, Asqar Súleımenov oqyǵan jalpy orta mektepke qalamger esimi berilip, eskertkishi ornatylǵan. Sonymen qatar Túrkistan qalasynda kóshe ataýy berilgen.
Ǵalymjan ELShIBAI,
«Egemen Qazaqstan»
Túrkistan oblysy