WBC uıymy ár jyldary orta salmaqta judyryqtasqan kásipqoı boksshylardyń tizimin jarııalady. Úzdikter reıtınginde bizdiń Gennadıı Golovkınge jetinshi oryn buıyrǵan eken.
Myqtylar kóshin Shýgar Reı Leonard bastap tur. AQSh-tyń dańqty boksshysy 1977 jyldan bastap, 1997 jylǵa deıin sharshy alańdy armansyz shaıqaǵan edi. Tabany kúrekteı 20 jyl aralyǵynda ol 40 kezdesý ótkizip, 36 ret jeńiske jetti. 25 qarsylasyn esinen tandyrdy. 3 ret utylyp, 1 báseke teń aıaqtaldy.
Ekinshi orynda – Bernard Hopkıns. Kásipqoı rıngte 30 jyl boıy judyryqtasqan amerıkalyq sańlaq óziniń sońǵy jekpe-jegin 2016 jyldyń jeltoqsan aıynda «shaý tartqan» 52 jasynda ótkizdi. Sol ýaqyt aralyǵynda 67 márte sharshy alańǵa shyǵyp, 55 ret jeńis toıyn toılady. 32 básekeni merziminen buryn aıaqtady. 8 ret utyldy, 2 ret teń tústi, taǵy 2 kezdesýdiń nátıjesi esepke alynbady.
Úshinshi oryndy Djoı Djıardello ıelendi. 1930 jyly AQSh-ta týyp-ósken ol kásipqoılar arasynda 1948-1967 jyldar aralyǵynda óner kórsetti. 135 ret rıngke kóterilip, 100 márte jeńis toıyn toılady. 32 kezdesýde aıqyn basymdyq tanytty. 27 ret utylyp, 8 báseke teń aıaqtaldy.
Sondaı-aq, orta salmaqtaǵy «TOP-10» boksylardyń qataryna Karlos Monson (Argentına), Marvın Hagler (AQSh), Nıno Benvenýtı (Italııa), Emıl Grıffıt (AQSh), Serhıo Martınes (Argentına) jáne Rodrıgo Valdes (Kolýmbııa) syndy sańlaqtar endi.
Ǵalym SÚLEIMEN,
«Egemen Qazaqstan»