Dostyq úıinde ótken Qazaqstan halqy oblystyq assambleıasynyń HHIII sessııasyna etnomádenı birlestik jetekshileri, úkimettik emes uıym, jastar ókilderi qatysyp, 2018 jyldyń qorytyndylaryn shyǵardy. Aldaǵy atqarylatyn mindetterdi belgiledi.
Saıası qurylymnyń tóraǵasy, aımaq basshysy Qumar Aqsaqalov óńirde 26 oblystyq, 175 aýdandyq etnomádenı uıymdar qataryna 5 myńǵa jýyq belsendiniń tartylǵanyn, olardyń basty muraty ultaralyq, konfessııaaralyq yntymaqty, birlikti nyǵaıtý bolyp bolyp tabylatynyn atap kórsetti.
«Kelesi jyly assambleıaǵa bólinetin qarajat eki esege ulǵaıady. 2019 jyl О́zbekstanda Qazaqstan jyly dep jarııalandy. Osyǵan oraı aımaqta ózbek mádenı birlestigi óz jumysyn bastaıtyn bolady», dedi Qumar Irgebaıuly.
Jergilikti assambleıa ózge elderde turatyn qandastarymyzben de tyǵyz qarym-qatynas ornatqan. Bul týraly Qorǵan oblysy qazaq ulttyq-mádenı avtonomııasynyń tóraǵasy Qaırat Oralov aıtyp berdi. Qorǵan oblysyn mekendeıtin 14 myńǵa jýyq aǵaıynymyz ulttyq salt dástúrdi berik ustanady. Syrtta júrse de ata-baba jerin umytpaıdy. Qazaqstandy maqtan tutady.
«Dýslyk» tatar – bashqurt entomádenı ortalyǵynyń jetekshisi Naıl Abraev aldaǵy josparlarymen bólisti. Kelesi jyly qoǵamnyń qurylǵanyna 30 jyl tolady. Oǵan daıyndyq sharalary qazirden bastalyp ketken.
Sessııada oblystyq Qazaqstan halqy Assambleıasy tóraǵasynyń qoǵamdyq negizdegi orynbasary saılandy. Bul qyzmetti "Somonıen Sever» tájik birlestiginiń jetekshisi Anvarshoh Amırshoev atqaratyn bolady. Mádenı ortalyqtardyń birqatar ókiline marapat tapsyryldy.
О́mir ESQALI,
«Egemen Qazaqstan»
Soltústik Qazaqstan oblysy