Aptanyń sońǵy jumys kúni Ulttyq sport qaýymdastyǵynyń uıymdastyrýymen Astanadaǵy «Qazmedıa» ortalyǵynyń konsert zalynda «Altyn Tuǵyr-2018» atty ulttyq sport úzdikterin marapattaý saltanatty keshi ótti.
Ulttyq sport salasyndaǵy úzdikterdiń mereıin kóterýdi maqsat tutqan «Altyn tuǵyr» saltanatty jıyny bıyl altynshy márte uıymdastyrylyp otyr. Dástúrli marapattaý jıynyna Mádenıet jáne sport mınıstri Arystanbek Muhamedıuly, Ulttyq sport qaýymdastyǵynyń qurmetti prezıdenti, general-maıor Qaırat Satybaldyuly, Májilis depýtaty, Ulttyq sport qaýymdastyǵynyń prezıdenti Bekbolat Tileýhan qatysyp, ulttyq sporttyń jyl úzdikterine syılyqtar tapsyryp, quttyqtaý sóz sóıledi.
Elimizge tanymal sahna sańlaqtarynyń sazdy konsertimen órilgen bıylǵy «Altyn tuǵyr» syılyǵynyń ıegerleri – 2018 jylǵy ulttyq sporttyń halyqaralyq básekesinde dara shyqqan jeńimpazdar boldy.Ulttyq sport túrleriniń úzdikter nomınasııasy boıynsha «Úzdik mergen» Abzal Týlybekov, «Úzdik shabandoz» Baýyrjan Myrzabaev, «Úzdik kókpar komandasy» – «Qulager» komandasy, «Úzdik kókparshy» Aslanbek Saıdýlla, «Úzdik aýdaryspaqshy» Shyńǵyshan Erjanov pen Azamat Serǵazın, «Úzdik teńge ilýshi» – Maǵjan Saparbek, «Úzdik qusbegi» Babajan Berikbolsyn, «Úzdik qazaq kúresiniń balýany» Ersultan Muzapparov, «Úzdik toǵyzqumalaq oıynshysy» Ásel Dalıeva, «Úzdik asyq atýshy» Muhtar Ahmetov dep tanylsa, «Úzdik báıge aty» atalymy boıynsha «Altyn tuǵyr» «Qarakóz» atty júırikke berildi. Attyń ıesi Artyǵalı Mırazov, shabandozy Bekzat Sádýaqas. Sondaı-aq, Nurlan Dodaı «Úzdik jattyqtyrýshy», Qazaqstanda ótken halyqaralyq ulttyq sport chempıonattaryna Reseı ulttyq qurama komandasyn birneshe jyl bastap kelgen Erbol Edilbaev «Úzdik jetekshi», Gúlnar Bazarhanova «Úzdik tóreshi» ataǵymen marapattalyp, Qyzylorda oblysynyń ákimi Qyrymbek Kósherbaevqa «Elimjan» medali tabys etildi. Al, Derbis Baıdildaev, Baǵdat Múptekeqyzy, Jomart Sabyrjanov, О́nerbaı Janbala «Ulttyq sport ardageri» medalimen marapattaldy.
«Bıyl ulttyq sport úshin erekshe jyl boldy dep aıtýǵa bolady. О́ıtkeni, halyqaralyq básekelerde bizdiń sańlaqtarymyz san márte dara shyqty. Atap aıtsaq, aýdaryspaqtan III Azııa chempıonatynda, teńge ilý men qusbegilikten II Azııa chempıonatynda, jamby atýdan XIV álem chempıonatynda, kókpardan, toǵyzqumalaqtan, asyq atýdan, qazaq kúresinen halyqaralyq jarystarda júldeli oryn ıelengen sportshylarymyz barshylyq. Sol sııaqty bıyl Ońtústik Koreıada jamby atýdan ótken álem chempıonatynda 23 eldiń ishinen sportshylarymyz I oryn ıelendi. Búgingi syı-qurmet sol ulttyq sport básekelerinde el namysyn asqaqtatyp júrgen azamattarymyzdyń esimin ardaqtaýǵa arnalady», - dedi Ulttyq sport túrleri qaýymdastyǵynyń prezıdenti Bekbolat Tileýhan.
Sonymen birge, ulttyq sport salasynyń damýyna eńbek sińirgen kóptegen azamattar Ulttyq sport qaýymdastyǵynyń arnaıy dıplomy, alǵys haty jáne qarjylaı syılyqtaryna ıe boldy. Ulttyq rýhqa dem bergen aıtýly keshti elimizge tanymal óner juldyzdary án-kúımen árlep, jınalǵan kóptiń jigerin janyp, ulttyq sporttyń naǵyz jankúıeri bolýǵa shaqyrdy.
Ularbek NURǴALYMULY, «Egemen Qazaqstan»