Búgin «Qazaqstannyń turǵyn úı qurylys jınaq banki» AQ ujymy buryn-sońdy bolmaǵan úrdis bastap, jańajyldyq merekeni Medeý muz aıdynynda qarsy aldy. Mundaı erekshe meıramǵa Banktiń 600-deı qyzmetkeri otbasy múshelerimen birge muz aıdynyn toltyrdy. Osylaısha Turǵyn úı qurylys jınaq banki qyzmetkerleri jańajyldyq korporatıvti muz aıdynynda ótkizdi.
«Búgin biz Medeý shatqalyndaǵy úlken korporatıvte ótken jylǵa esep berip, úzdik qyzmetkerlerimizdi marapattap, 2019 jyldy erekshe qarsy alýǵa sheshim qabyldadyq. Mundaı korporatıv bizdiń banktiń ıdeologııasymen tolyq úılesedi. Shaharymyzdyń keremet tórinde ujym bolyp bir kisideı saf aýada konkı teýip, sportty da nasıhattap, aıta-aıta júrerlikteı tamasha demalysty ótkerip júrmiz. Eń bastysy, óz ómirimizdi jaqsartyp qana qoımaı, balalarymyzdyń alańsyz keleshegin qamtamasyz etip, keń ári ádemi úıler men páterlerdiń ıesi atanamyz desek, qundylyqtar júıesin ózgertý kerek. Ári muny udaıy aıtyp otyramyz. Máselen qazir qoǵamda beleń alyp turǵan bir mezettik tutynýshylyq ıdeologııaǵa qarsylyq retinde uzaqmerzimdi jınaq mádenıetin qalyptastyryp, damytý qajet. Sondyqtan osyǵan aldymen ózimiz úlgi bolyp, artyq shyǵynsyz-aq mereke atap ótip, kóńil kóterýge bolatynyn dáleldeıik dep sheshim qabyldadyq», – deıdi Turǵyn úı qurylys jınaq banki basqarma tóraıymy Lázzat Ibragımova.
Turǵyn úı qurylys jınaq bankiniń meıramyna tek qyzmetkerler ǵana emes, osy kúni Medeýge konkı tebýge kelgen Almaty turǵyndary men qonaqtary da qatysty. Jınalǵan meımandar úshin muz aıdynynda ««Medeo band» mýzyka toby óner kórsetti. Sondaı-aq qyzyqty baıqaýlar uıymdastyryldy. Shara sońynda «Turǵyn úı qurylys jınaq banki Aıaz Atasy» atty áserli fleshmob uıymdastyryldy.
«Turǵyn úı qurylys jınaq banki – qasań memlekettik qurylym degen oıdy ózgertkimiz keledi. 2018 jyl boıy biz klıenttermen jáne jalpy qoǵammen dıalog júrgizýdiń jańa ári erekshe formalaryn qurý boıynsha jumys júrgizdik», – deıdi Lázzat Ibragımova.