«Qostanaı jastarynyń altyn kitabyna» búginge deıin ózgelerden talantymen, eńbegimen, úlgisimen erekshelengen 195 jastyń esiimi altyn árippen jazylǵan bolatyn. Oǵan taǵy da 11 jastyń esimi saltanatty túrde tirkeldi. Bıyl on 14-shi ret ótkizilip otyrǵan bul jobanyń elimizdiń basqa óńirinde balamasy joq.
«Esimi altyn árippen jazylyp otyrǵan osy jastardyń barlyǵy da mundaı bedeldi ataqqa óziniń taza eńbegimen jetti. Olar eń aldymen ózgelerge úlgi. Ár jyldary esimi osy kitapqa kirgen jastar qazir elimizge belgili azamattar bolyp qalyptasty. Mysaly osy kitapqa esimi birinshi bolyp tirkelgen «Tobyl» komandasynyń fýtbolshysy Nurlan Jumasqalıev elimizdegi sport ańyzdarynyń birine aınaldy. Qazir osy komanda basshylarynyń biri bolyp otyr. Álııa Saparova Parlament depýtaty, al álem chempıony Denıs Kýzın «100 jańa esim» jobasynyń jeńimpazy boldy» dedi oblys ákimi Arhımed Muhambetov.
Joba laýreattary birneshe atalym boıynsha marapattaldy. Olardy ár saladaǵy belgili, ardager, halyqtyń qurmetine bólengen jandar tapsyrdy. Marapattalǵandardyń arasynda beıbit kúnde erlik kórsetkender, sport, óner, mádenıet, bilim men densaýlyq salasynda, bızneste júrgen úzdik jastar bar. Qostanaı oblysynyń «altyn jastarynyń» qatarynan ánshi, halyqaralyq baıqaýdyń laýreaty Ernar Sadyrbaev ta oryn aldy.
Oblys ákimi Arhımed Muhambetov saltanatty jıynnyń sońynda Jastar jyly bolyp belgilengen 2019 jyly oblysta atqarylar keleli isterdi atap ótti.
– Qostanaı qalasynyń «Iýbıleınyı» jańa shaǵyn turǵyn aýdanynda zamanaýı Jastar saraıy salynyp jatyr. Úlken, keń ǵımaratta birneshe zaldar, jastarǵa baılanysty jumystar júrgiziletin kabınetter jabdyqtalady. Jastar saraıynyń qurylysy kelesi jyldyń naýryz aıynda aıaqtalady, onyń aınalasyn kórkeıtý, abattandyrý jumystary jazda tolyq aıaqtalady. Sonymen qatar oblys ortalyǵynda jańa úlgidegi sport jáne jastardyń robot tehnıkalarymen aınalysýyna qolaıly ǵımarattar da boı kóteretin bolady. «Iýbıleınyı» turǵyn aýdanyndaǵy «Qostanaı-Plaza» saýda-oıyn-saýyq kesheni taǵy da keńeıtiledi. Onda oıyn-saýyq jáne demalys orandary ornalasady, – dedi Arhımed Begejanuly.
Názıra Járimbet,
«Egemen Qazqstan»
Qostanaı