Shymkentte jedel járdem kórsetetin 3 jańa beket ashyldy. Shaǵynaýdandarda ornalasqan bul beketterde 24 brıgada halyqqa jedel medısınalyq kómek beredi.
Jańa beketterdiń qajettiligin sala mamandary turǵyndardyń shaqyrýlary men shaǵymdaryn esepke ala otyryp anyqtaǵan. Zertteý qortyndysy boıynsha shahardaǵy halyq tyǵyz ornalasqan Qaıtpas-2, Aıqap jáne Qarabastaý shaǵynaýdandarynda úsh bekettiń ǵımaraty boı kóterdi. Nátıjesinde jedel járdem brıgadalarynyń naýqastarǵa jetý ýaqyty azaıady, deıdi densaýlyq saqtaý mekemesiniń ókilderi.
Nysandardyń ashylý saltanatyna qalalyq densaýlyq saqtaý basqarmasynyń basshysy Nurlan Qasymov qatysyp, sý jańa beketterdiń turǵyndarǵa em-dom kórsetýge qanshalyqty daıyn ekendigin tekserdi.
Munan bylaı basy aýyryp, baltyry syzdaǵandarǵa jedel járdem brıgadasy burynǵydan erterek jetpek. Bul týraly aqhalattylardyń ózi keshigý ýaqyty tórt mınýtqa qysqaradyǵyn aıtady.
Jańa nysandar zamanaýı qurylǵylarmen jabdyqtalǵan. Bekette dıspetcherlik bólme, beket meńgerýshisi men aǵa feldsherdiń kabıneti, dárihana qoımasy, qobdısha toltyrý bólmesi, akt zaly men demalys bólmesi, kólik turaǵy sııaqty qajettiniń barlyǵy bar. Mamandar ınternet arqyly naýqastyń mekenjaıyn anyqtap, dıagnozymen tanysa alady.
«Búgingi tańda jedel járdem qyzmeti shaqyrtýlarǵa 10 mınýt ishinde kelýde. Burynǵyǵa qaraǵanda 3-4 mınýt jyldam jetýge múmkindik jasap otyrmyz. Eger normatıv 10-15 mınýt bolsa, qalalyq jedel járdem qyzmetkerleri shaqyrtýǵa 10-11 mınýtta jetetin bolady. Halyq sany kóbeıip, qala aýmaǵy keńeıip jatqandyqtan, áli de beketter qajet. Qazirge 81 brıgada bar. Bolashaqta ózge de medısınalyq ǵımarattardy ashamyz. Jalpy talap boıynsha qalaǵa 100 brıgada qajet. Kelesi jyly soǵan jetemiz degen jospar bar», deıdi qalanyń bas dárigeri.
№1, №3, №6 beketter Qaıtpas-2, Aıqap shaǵynaýdandary jáne Qapal batyr kóshesinde ornalasqan. Qaıtpas-2 shaǵynaýdanyndaǵy №6 bekette 10 brıgada 150 myń turǵynǵa medısınalyq kómek kórsetse, №1 bekette 6 brıgada 9 myń halyqqa, №3 bekettegi 8 brıgada 12 myń turǵynǵa qyzmet kórsete alady.
Shaqyrtýlarǵa jalpy 24 jedel járdem brıgadalary shyǵady. Olardyń ishinde ıntensıvti terapııa brıgadasy, jelilik dárigerlik brıgada, ıntensıvti pedıatrııalyq brıgada, jalpy pedıatrııalyq jáne feldsherlik brıgadalar bar.
Basqarma basshysynyń aıtýynsha, jedel járdem qyzmetiniń sapasyn jaqsartý maqsatynda túrik kásipkerlerimen memorandým jasalǵan. Sonyń aıasynda kelesi jyly qalaǵa jańa 100 jedel járdem kóligi jetkiziletin bolady.
Nurshat TО́KEN,
«Egemen Qazaqstan»