Túrkistan oblysynyń Qazyǵurt aýdanynda 2 gektar aýmaqqa jyldam pisiriletin kespe shyǵaratyn zaýyt óndirisin keńeıtý boıynsha aýqymdy jańǵyrtý jumystary bastaldy.
Bıyl qarasha aıynda Qazyǵurttaǵy óndirisi toqtap turǵan zaýyttyń menshik ıesi men Nepal eliniń tuńǵysh mıllıarderi Bınod Choýdharıge tıesili «Chaudhary Group» (CG Global) korporasııasy arasynda atalǵan zaýytty satyp alý týraly kelisim jasaldy. Kelisim-shart nátıjesinde jańa kompanııa qajetti jabdyqtardy ornatyp, ekinshi óndiristik jelini salý jumystaryna kiristi.
Keler jyldyń naýryz aıynda «CG Global» korporasııasynyń enshiles kásiporny «CG Foods Central Asia» kompanııasy óndiristi túbegeıli iske qosyp, jylyna 1100 tonna ónim shyǵarýdy josparlap otyr.
«Túrkistan oblysynda bastapqy kezde ónimniń 10 túrin shyǵarýdy kózdep otyrmyz. Barlyq óndiristik tehnologııalar eýropalyq sapa standarttaryna sáıkes keledi. Zaýyt janynan taǵy jańa seh salamyz, onda kespege arnalǵan arnaıy dámdeýishter shyǵarylady», deıdi «CG Foods Central Asia» kompanııasynyń bas dırektory Kıshor Lodha.
Atalǵan tamaq ónimderin daıyndaýda 70 paıyz otandyq, 30 paıyz Malaızııa, Sıngapýr jáne Úndistannan kelgen shıkizattar paıdalanylmaq. Al, daıyn ónim Ortalyq Azııa elderine eksporttalady.
«CG Foods Central Asia» kompanııasy О́zbekstan, Tájikstan, Qyrǵyzstan syndy elderde satylym naryǵyn qalyptastyrǵan. Sonymen qatar korporasııanyń ónimi Úndistan naryǵynyń 60 paıyzyn qamdaı alady. Áleýetti tutynýshylar sany shamamen 200 mıllıonǵa jýyq adamdy quraıdy. Bul – óte úlken kólemdegi naryq. Túrkistan oblysynda kespe «Wai-wai» brendimen shyǵarylady. Ol taı tilinen aýdarǵanda «tez-tez» degen maǵynany bildiredi. Jergilikti tutynýshylar úshin ónimniń mańyzdy tusy – barlyq ónim halal bolady», deıdi «Túrkistan» ÁKK» AQ fılıaly «Turkistan Invest» kompanııasynyń syrtqy baılanystar jónindegi basqarýshy dırektory Baıan Kaıýpova.
Atalǵan ınvestısııalyq jobaǵa «TURKISTAN INVEST» kompanııasynyń ujymy úlken qoldaý bildirgen. Tıisti qujattardy daıyndaý, jer telimin zańdastyrý, tehnıkalyq jáne ınfraqurylymdyq máselelerdi sheshýge deıin bir tereze qaǵıdasy boıynsha qyzmet kórsetipti.
«Jobany iske asyrýda jergilikti bılik kóp kómek kórsetti. Oblys ákimi Janseıit Túımebaev bastaǵan basshylyqqa alǵys aıtamyn. Joba barysynda týyndaǵan máseleler tez arada sheshimin tapty. Men úshin bul úlken qurmet. Bızneste eń basty dúnıe bul – senim, ol adal seriktestik qurýda jáne ony ary qaraı sátti damytýda óte mańyzdy. «TURKISTAN INVEST» kompanııasynyń iskerlik qarym-qatynastardaǵy kəsibı biliktiligi unady», dedi nepaldyq kásipker.
Joba aıasynda 100-den astam jumys orny qurylyp, jergilikti turǵyndardy jumyspen qamtý josparlanýda.
Túrkistan oblysyna ınvestısııa salýǵa kelgen «CG Global» korporasııasynyń ıesi Bınod Choýdharı 2013 jyly Forbes tizimine engen. Álemniń 30-dan astam elinde 11 túrli baǵytta jumys isteıtin 80 kompanııadan quralǵan (6 myń qyzmetker) ımperııany qurý úshin oǵan 40 jyl qajet boldy. Búginde onyń baılyǵy 1,5 mlrd dollardy quraıdy.
Nurshat TО́KEN,
«Egemen Qazaqstan»