Túrkistan qalasynda Memleket basshysy Nursultan Nazarbaevtyń atynan mektep oqýshylaryna arnalǵan jańa jyldyq shyrsha merekesi ótti.
О́ńirdegi ata-ana qamqorlyǵynsyz qalǵan, áleýmettik az qamtylǵan jáne kópbalaly otbasylardan shyqqan úzdik oqýshylar qatysqan merekelik sharada Elbasy atynan ár balaǵa noýtbýk, qystyq kıimder men tátti syılyqtar tabys etildi. «Jarqyra, Qazaqstan! Jarqyra, týǵan jer!» ataýymen uıymdastyrylǵan sharaǵa qatysqan oblys ákimi Janseıit Túımebaev balalarmen birge led-ekrannan Elbasynyń quttyqtaý sózin tyńdap, shyrsha shamyn jaqty. «Búgin, Sizder, elimizde úrdiske aınalǵan «Prezıdent shyrshasyna» qatysýdasyzdar! Bul – Elbasy Nursultan Nazarbaevtyń Qazaqstannyń jarqyn bolashaǵy - Sizderge degen úlken qurmeti. Sizderdiń bilimdi, parasatty, jan-jaqty damyǵan tulǵa retinde qalyptasyp, zaman aǵymyna beıimdelgish, básekege qabiletti bolyp jetilýlerińiz úshin memleket barlyq múmkindikter men ıgi sharalardy atqarýda jáne atqaratyn bolady!», - dedi J.Túımebaev.
Aıta ketelik, búginde óńir balalary bıýdjetten 748,0 mln.teńgege 128 mektepke satyp alynǵan robototehnıka kabınetterinde kompıýterlik baǵdarlamalaý daǵdylaryna, qarapaıym algorıtmder qurastyrýǵa, Web-saıt jáne kompıýterlik oıyndar men anımasııalardy qurýdy eýropalyq standarttarmen úırenýde. Sondaı-aq 2017 jyldan bastap oblysta «KazRobosport» chempıonaty men «KazRoboproject» ǵylymı-tehnıkalyq jobalar konkýrsy ótkizilýde. Jeńimpazdar respýblıkalyq chempıonatqa qatysyp, komandalyq júldeli 2-oryndy ıelendi. Al elimizdiń mektep jáne kolledj oqýshylary arasyndaǵy IX jazǵy spartakıadaǵa qatysqan Túrkistan oblysynyń oqýshylary jalpy komandalyq esepte birinshi orynǵa ıe boldy. Jalpy bilim beretin pánder boıynsha ótken respýblıkalyq olımpıadada Túrkistan oblysynan qatysqan oqýshylardyń 25-i júldeger atandy. Bilimimen osyndaı bıikterden kóringen oqýshylar arasynda Prezıdent shyrshasyna qatysýshylar da bar.
Ǵalymjan ELShIBAI,
«Egemen Qazaqstan»
Túrkistan oblysy