Bul kúnderi Almatydaǵy Qazaq memlekettik sırki óz repertýaryn tańǵajaıyp trıýktermen tolyqtyrý úshin jańa talanttardy toǵystyrýǵa kóshti.
Kip-kishkentaı kórermenderin ári qýantyp, ári tańǵaldyrý úshin bıyl sheteldik ónerpazdardyń qatysýymen «Jańa jyldyq Sýdoký» qoıylymyn arenaǵa shyǵardy. Jańajyldyq alǵashqy qoıylymǵa balalar úıleriniń baldyrǵandary men kóp balaly otbasylar ortaqtasyp, rııasyz qýanyshqa bólendi.
– Jyl saıyn kórermenderimizge tosynsyı jasaý úshin bar ónerimizdi salamyz. О́tken jyly «Er Tóstik» ertegisi qoıyldy. Bıylǵy qoıylymnyń ózgesheligi – sırkke sheteldik ártisterdi shaqyrdyq. Olar kóptegen halyqaralyq sırk óneri festıvaliniń birneshe dúrkin laýreattary kloýn Armen Asırıans (Ispanııa), Máskeýdegi Nıkýlın sırkiniń bos satydaǵy ekvılıbrıst-jongleri Krıstına Gýk (Reseı), shaýyp bara jatqan attyń qulaǵynda oınaıtyn «Nomad» tobynyń ártisi Alfııa Kýngýjınova men onyń kaskader qyzdary, sporttyq gımnastıkadan álem chempıony, «Batýttaǵy akrobattar» nomeriniń jetekshisi Sergeı Fedorchenkolar, – deıdi «Qazaq memlekettik sırki» MKQK dırektory Baqyt Bókebaev.
Osylaısha salt-dástúri jaǵynan ózimizge jaqyn japon ápsanalaryna baryp otyr. Sıýjet boıynsha japon arýaǵy Emma óziniń jaýyz nókerlerimen kishkentaı kórermenderdi Jańa jyl tumarynan aıyrmaqshy bolady. Qara kúshterdi maqsatyna jetkizbeý jolynda sırk trýppasy san alýan ónerdiń túrin kórsetti.
Merekelik baǵdarlamada J.Elebekov atyndaǵy Respýblıkalyq estrada jáne sırk kolledjiniń jańa túlekteri de birinshi ret kúrdeli akrobatıkalyq nómirlerimen óner kórsetýge múmkindik aldy.
Ertegi sońynda Aqshaqar súıkimdi qoıandarymen, qunjyń qaqqan meıirimdi aıýlarymen shyǵyp, sıqyrly sandar kúshimen jańajyldyq Sýdokýdyń sheshimi tabyldy.
Aınash ESALI,
«Egemen Qazaqstan»
ALMATY