Jappaı júrgizilip jatqan sıfrlandyrý baǵdarlamasynyń oń nátıjesi naqty salalarda óz jemisin bere bastady. Ásirese aımaqtaǵy damýy kenjelep qalǵan baǵyttar úshin bul baǵdarlama tosyn kúsh berip, ıgilikke jol ashty. Mysaly, óńirlerdegi medısınalyq qyzmet kórsetý salasynyń jumysyna sıfrly basqarýdyń engizilýi dárigerlerdiń jumysyn jeńildetip qana qoımaı, turǵyndardyń densaýlyǵyn saqtaýǵa jańasha serpin qosty.
Almaty oblysynda densaýlyq saqtaý basqarmasynyń júıesinde jedel járdem qyzmetiniń sapasyn arttyrýǵa baǵyttalǵan «Kómek-103» atty baǵdarlama júzege asyrylýda. Otandyq IT-mamandardyń qolynan shyqqan sırfly baǵdarlama oblystaǵy jedel járdem qyzmetin bir júıege shoǵyrlandyrý, bir ortalyqtan basqarýǵa múmkindik berip otyr.
– «Kómek-103» baǵdarlamasyn ózimizdiń mamandarmen aqyldasa otyryp qoldanysqa engizdik. Bul júıeniń iske qosylýy jedel járdem qyzmetiniń sapasyn jaqsartyp, dárigerlerdiń alǵashqy medısınalyq kómek kórsetýiniń múmkindigin ósirdi. Nátıjesinde, adam ómiri úshin kúres nátıjeli bola bastady, – deıdi Almaty oblystyq densaýlyq saqtaý basqarmasy Jedel járdem stansasynyń bas dárigeri Birjan Ospanov.
«Kómek-103» baǵdarlamasy ońaı ári ońtaıly jumys isteıdi. Oblystaǵy barlyq jedel járdem qyzmeti avtomattandyrylǵan ortalyqqa qosylyp, qońyraý qabyldaý jelisi arnaıy algorıtm boıynsha retteledi. Qazir oblystyń qala men aýdan ortalyqtarynan bólek, aýyldarda da jedel járdem stansasyna túsken telefon qońyraýyna 20 sekýndtan 1 mınýt aralyǵynda jaýap berilip, kómekke muqtaj adamnyń jaǵdaıy týraly dástúrli suraq qoıylady. Ol naýqastyń dene qyzýy, aýrý barysy jaıly qarapaıym saýaldardan turady. Osy aralyqta baǵdarlama kezekshisi jedel járdem kóligindegi dárigerdiń telefonyna shaqyrtý túsken naýqastyń jaǵdaıy men kórsetiletin kómektiń barysy týraly SMS habarlama joldap, tıisti nusqaý berip úlgeredi jáne sıfrly júıe tirkelgen naýqas tarıhyn jedel saraptap, kórsetiletin kómektiń sanatyn avtomatty túrde anyqtaıdy da, eń jaqyn mańdaǵy aýrýhanaǵa habar jiberedi.
– «Kómek-103» júıesi jedel járdem qyzmetin 4 sanatqa bólip qarastyrady. Mysaly, 1-sanatqa adam ómirine qater tóngen jaǵdaı, dárigerdiń jedel aralasýy qajet naýqastardan túsken shaqyrtý jatqyzylady. Bul sanat úshin dárigerler brıgadasynyń naýqasqa jetý ýaqyty 10 mınýt bolyp belgilenedi. 2-sanat boıynsha kómek berý ýaqyty – 15 mınýt, al úshinshi jáne tórtinshi sanattaǵy naýqastar úshin 30 mınýt pen bir saǵat aralyǵy. Bul jumysty buryn kezekshi dıspetcher rettep, úlgermeı jatatyn bolsa, jańa júıeniń engizilýimen avtomatty túrde rettelip, naýqastyń mekenjaıyn karta boıynsha anyqtaý men qandaı kómekti birinshi kórsetý jaıly nusqaýlyq ta dárigerge jyldam jiberiledi, – dedi B.Ospanov.
Jalpy, sıfrlandyrý baǵdarlamasynyń ıgiligin alys aýyldardan buryn qalalyq óńirler alǵashqy bolyp sezinip otyrǵany belgili. Bul rette aýyldardaǵy telekommýnıkasııa júıesiniń damymaı qalýy sıfrly júıelerdiń qyzmet kórsetýine kedergi bolyp otyrǵandyǵyn aıtýymyz kerek. О́kinishke qaraı, Almaty oblysynda keń jolaqty ınternetke qosylý úrdisi alys aýyldarǵa áli arman bolyp tur. Nátıjesinde, halyqqa qyzmet kórsetý barysynda ozyq tásilder retinde tanylǵan kóptegen sıfrly baǵdarlamalar eldi mekenderde qoljetimsiz kúıinde qalyp otyr. Sonyń biri – Almaty oblysy ákimdigi men densaýlyq saqtaý basqarmasy tarapynan qolǵa alynǵan «Kómek-103» baǵdarlamasy.
Qalmahanbet MUQAMETQALI,
«Egemen Qazaqstan»