Kók teńizdiń atyn ıelengen aqtaýlyq fýtbol komandasy ózindik oıyn órnegin kórsetip júrgen toptyń biri. Jelkildegen jastardan quralǵan ári bıyl jóndeýden ótken stadıonda oıyn ótkizýge múmkindik alǵan top endigi kezekte premer-lıgaǵa shyǵýdy josparlap otyr.
Fýtbol klýbynyń basshylyǵy men bapkerler quramy fýtbol maýsymynyń qorytyndylary men aldaǵy josparlary týraly baıandady. «Kaspıı» fýtbol klýby «Arsenal Kıev» komandasymen memorandýmǵa qol qoıyp, búginde mańǵystaýlyq eki oıynshy ýkraınalyq fýtbol klýbynda tájirıbeden ótýde.
Fýtbol – jastardyń qyzyǵýshylyǵyna ıe jáne jalpyǵa barynsha qoljetimdi oıyn túri, qalada úı mańyndaǵy oıyn alańdarynda asyr salǵan, aýylda tegis jerdi taýyp alyp fýtbol oıynyn qyzdyrǵan balalardy da, eresekterdi de jıi kezdestiretinimiz bar. Atalmysh fýtbol klýby jastar arasynda fýtbol sportyn keńinen nasıhattaý ári jastardy fýtbolǵa kásibı turǵyda daıyndaý maqsatynda ashyq esik kúnderin ótkizdi. Oǵan 300 jas sportshy qatysyp, fýtbol áleminiń syrlaryna qanyǵa tústi, sondaı-aq balalar arasynda «Caspy Cup» týrnıri ótkizildi. Júrgizilgen jumystar nátıjesinde fýtbol ortalyqtary men akademııalar arasynda ótken Qazaqstan birinshiliginiń aqtyq saıysynda jas mańǵystaýlyqtar 3-oryndy jeńip aldy. Sonymen qatar bıyl jóndeýden ótken «Jas qanat» stadıonynda alǵash ret «Kaspıı» fýtbol klýby óz alańynda «Qaırat A» komandasymen oıyn ótkizip, oıynǵa 3200 kórermen qatysty.
– Ártúrli jaǵdaılarǵa baılanysty kórermender sanynyń kóp bolýy 2001 jyldan beri bolmaǵan edi. Oıyndy tamashalaýshylardyń kóp bolýy da fýtbolshylar úshin mańyzdy. Nátıjesinde «Kaspıı» fýtbol komandasy kórermenderdiń oıynǵa kelýi jaǵynan Birinshi lıga komandalary arasynda 2-oryndy aldy, – deıdi «Kaspıı» fýtbol klýbynyń damý boıynsha menedjeri Vladımır Rıbıch.
«Kaspıı» fýtbol klýby basshylyǵynyń bolashaqqa mejelegen josparlary zor. Olar úshin aldyna qoıǵan bıik maqsattarǵa jetý úshin mamandardyń biliktiligin arttyrý – negizgi basym baǵyttardyń biri. Sondyqtan klýbtyń jańa basshylary bıyl mańǵystaýlyq fýtbol klýbyna kelgen sheteldik mamandardyń atsalysýymen jergilikti mamandardyń biliktiligin arttyrýdy kózdep otyr.
Klýb basshylyǵynyń aıtýynsha, Aqtaýǵa qosymsha taǵy bir stadıon men jattyǵý úshin fýtbol bazasy jáne fýtbol sportyn odan ári nasıhattaý úshin marketıngtik jumys qajet. Sondaı-aq 2018 jyldyń aıaǵyna deıin Mańǵystaý oblysynyń balalar quramasyn quryp, barlyq jattyqtyrýshylar úshin semınar ótkizip, balalarǵa arnalǵan «Bolashaq chempıondar lıgasyn» uıymdastyryp, mektep oqýshylaryna arnap promo-aksııalar uıymdastyrýdy kózdep otyr.
Úlken men kishiniń yqylasy aýǵan sport túri nasıhatyn jandandyryp, óz sportshylaryn, ásirese balalardy alańǵa shaqyrsa bas tartatyny bolmasy anyq.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy