Erkin kúresten 2019 jylǵy álem kýbogy jolyndaǵy jarys Reseıdiń Iаkýtsk qalasynda ótedi. Bul aqparat Birlesken kúres álemi (UWW) men Reseı sporttyq kúres federasııasynyń (RSKF) resmı saıttarynda jarııalanyp otyr.
Araǵa jeti jyl salyp, álem kýbogy Reseıde ótetin boldy. Bul jańalyqty biz qýana-qýana qabyldadyq. Onyń ústine Reseı quramasy sońǵy jeti jarysta bas júldege qol jetkize almaǵan edi. Bizdiń balýandar sol olqylyqtyń orynyn Iаkýtskide toltyrady degen oıdamyz, – deıdi Reseı sporttyq kúres federasııasynyń prezıdenti Mıhaıl Mamıashvılı.
Álem kýbogynda alty komanda baq synaıdy. Dúnıejúziniń úzdik bes ulttyq quramalarynan bólek, aıtýly dodanyń joldamasyna ıelik ete almaǵan memleketter arasynan eń myqty balýandar iriktelinip alynyp, olar derbes komanda bolyp boz kilemge shyǵady. Al 2018 jyly Býdapeshte ótken álem chempıonatynyń qorytyndysy boıynsha Reseı, AQSh, Grýzııa, Kýba jáne Japonııa quramalary ozyq bestiktiń qatarynan kóringen bolatyn.
Aıtýly jarys 1956 jyldan beri 48 máre uıymdastyryldy. Bir ǵajaby, KSRO ydyryǵanǵa deıin álem kýbogynda ústemdik qurdy. 1956-1991 jyly aralyǵynda ótken 21 týrnırdiń 16-sy Odaq balýandarynyń jeńisimen aıaqtaldy. Sol aralyqta AQSh – 4 ret jáne Túrkııa bir ret top jardy. Odan keıingi ýaqytta taǵy tórt eldiń órenderine altyn tuǵyrǵa kóterilý baqyty buıyrdy. Al barlyǵy bas júldeni oljalaǵan memleketter mynalar:
KSRO – 16 ret
AQSh – 14 ret
Iran – 8 ret
Reseı – 6 ret
Ázirbaıjan – 2 ret
Túrkııa – 1 ret
Kýba – 1 ret
Sońǵy jarystyń jalaýy ústimizdegi jyldyń 7-8 sáýiri aralyǵynda AQSh-tyń Aıova Sıtı qalasynda jelbiregen bolatyn. Dúbirli dodada boz kilem qojaıyndary top jardy. Fınalda olar Ázirbaıjan quramasyn 6:4 esebimen eńserdi. Úshinshi oryn úshin talas ta dál sondaı eseppen aıaqtaldy. Bul tartysta Japonııa Kýbany qapy qaldyrdy. Besinshi oryn úshin básekede Grýzııa Mońǵolııadan 6:4 esebimen basym tústi. Qazaqstan quramasy AQSh-taǵy álem kýbogyn jetinshi orynmen qorytyndylady. Sońǵy saıysta otandastarymyz Úndistandy 10:0 esebimen tas-talqan etti.
Ǵalym SÚLEIMEN,
«Egemen Qazaqstan»