Statıstıkalyq málimetke júginsek, Túrkistan oblysy men Shymkent qalasy boıynsha, 13702 jumys istep turǵan kásiporyndar men mekemelerdiń 5725-inde (41,8%) ujymdyq shart jasalǵan, al 7977-inde (58,2%) jasalmaǵan. Ujymdyq shart jasalmaǵan mekemlerdiń basym bóligi jekemenshik ıeliginde.
Bul derekterdi «Túrkistan oblysy jáne Shymkent qalasy kásipodaqtar ortalyǵy» aýmaqtyq kásipodaqtar birlestiginiń tóraǵasy Berik Bekjanov brıfıngte málimdedi. Jalpy 17 salalyq kásipodaqtar biriktirilgen birlestik, 2052 bastaýysh uıymyndaǵy 217 myńnan astam kásipodaq músheleriniń quqy men múddelerin qorǵaıdy. Kásipodaqtardyń belsendiliginiń arqasynda 1836 mekemede ujymdyq shart jasalǵan, bul barlyq jasalǵan ujymdyq sharttardyń 32%-y. Bıylǵy tekserýler nátıjesinde 1288 eńbek qaýipsizdigin saqtaý erejelerin buzýshylyq anyqtalǵan. Olardyń 410-y eńbek qaýipsizdigi jaǵdaıyn qamtamasyz etýge qatysty bolsa, 261-i eńbek qaýipsizdigi Erejesin jáne nusqamalaryn buzǵan, 434-i arnaıy kıimmen jáne jeke qorǵanys kıimimen qamtamasyz etpegen. О́kinishke qaraı, 2018 jyly Túrkistan oblysy jáne Shymkent qalasy boıynsha kásiporyndar men uıymdarda 101 óndiristik jazataıym oqıǵa oryn alyp, zardap shekken 122 azamattyń 22-i qaıtys bolǵan, 51-i aýyr jaraqat alsa, 49-y jeńil jaraqattanǵan.
Kásiporyndardyń jumysshylarǵa bereshegin óteý baǵytyndaǵy jumystar da belsendi júrgizilip keledi. «Shymkent qalasy boıynsha jalaqy qaryzdardy joıý jóninde úshjaqty komıssııanyń atqarǵan jumystarynyń nátıjesinde 4 mekeme (10 adam – 2,9 mln.teńge) qaryzdaryn japqan, 2 mekeme bankrot (378 adam – 45 mln.teńge) dep tanylǵan. Búginge 6 mekemede 910 jumyskerdiń aldynda 143,4 mln. teńge jalaqy qaryzy qalyp otyr. Al Túrkistan oblysy boıynsha 2 mekeme (384 adam – 30,75 mln.teńge) qaryzyn jaýyp, 2 mekemedegi 73 jumyskerdiń aldynda 43 mln.735 myń teńge jalaqy qaryzy qalyp otyr», - deıdi aýmaqtyq kásipodaqtar birlestiginiń tóraǵasy Berik Bekjanov. Sondaı-aq, jumyskerlerdiń densaýlyǵyn jaqsartý maqsatynda kásipodaqtar ortalyǵy janynan «Proftýr» týrızm ortalyǵy 2018 jyldyń tamyz aıynan jumys isteýde. Búginge jalpy 15 joldama, «Merke», «Jańaqorǵan», «Mankent» jáne «Arman» shıpajaılaryna berilgen.
Ǵalymjan ELShIBAI,
«Egemen Qazaqstan»
Túrkistan oblysy