Oblystyq beıneleý óneri murajaıynda bastalǵan eseptik kórmede qaraǵandylyq qylqalam sheberleriniń bıylǵy jyldy tabysty aıaqtaǵaly otyrǵany aıtyldy. Mádenı mekemede uıymdastyrylǵan kóptegen is-shara ónersúıer qaýymnyń kóńilinen shyǵyp, laıyqty baǵasyn aldy.
Mysaly, bıyl Roza Abýseva, Mádıhan Qalmahanov, Sergeı Chechenov, Vladımır Trosenko syndy óńirge tanymal sýretshilerdiń jeke kórmeleriniń joǵary deńgeıde ótýi de joǵarydaǵy sózimizge dálel bola alady.
Al jyl sońyndaǵy kórmede kelýshiler nazaryna 80-nen astam jumys usynyldy. Ekspozısııada búgingi sýretshilerimizdi tolǵandyratyn ártúrli taqyryptardaǵy jáne túrli janrlardaǵy týyndylar bar. Sonymen qatar atalǵan kórmeniń tanymal qylqalam sheberleri men jas sýretshilerdiń, oqytýshylardyń jáne olardyń burynǵy stýdentteriniń basyn qosqanyn aıtqan lázim.
– Bul kórme maǵan taqyryptyq emestigimen unaıdy. Munda naqty bir taqyryp joq. Avtorlardy kóbine adamnyń ózi, onyń ishki jan dúnıesi, rýhanı bolmysy qyzyqtyrady. Dál osy kúıdi bizge Qýat Asqarov, Oleg Drozdov, Galına Kolomenskaıa, Mádıhan Qalmahanov kórsete aldy, – dep atap ótti ónertanýshy Natalıa Ivanına.
Qoryta aıtqanda, eseptik kórmedegi bir jyldy túıindegen týyndylar qaraǵandylyq sýretshilerdiń qazirgi qoǵamda bolyp jatqan túrli oqıǵalardy, adamdardy ne nárselerdiń tolǵandyratynyn, bizdiń túsinigimizdiń rýhanı turǵyda qanshalyqty tolyqqandyǵyn tanyp-bilýge qushtar ekendigin kórsetti.
Qaırat ÁBILDA,
«Egemen Qazaqstan»
QARAǴANDY