Qostanaıda aıaz kúsheıip tur. Biraq tabıǵat qaskóılerine bul kedergi bolatyn emes. Olar zańsyz ańshylyq quryp, saryshunaq aıazda adamnyń qaskóıligine emes, meıirimine zárý kıik pen elikterdi atýdy toqtatar emes.
Tabıǵat qorǵaý polıseıleri jaqynda Qostanaı-Mamlıýtka tas jolynyń boıynan «VAZ-2107» markaly jeńil kóligin toqtatty. Júrgizýshisi men eki jolaýshysy bar kólikti teksergende onyń bagajynan atyp alǵan eliktiń soıylmaǵan tutas eti men eki myltyq tabyldy.
Teksergende myltyqtyń ekeýi de mashınadaǵy bir jolaýshynyń atyna tirkelgeni belgili boldy. Meńdiǵara aýdanynda turatyn úsh brakoner Qostanaı aýdanyna kelip, ańshylyq qurǵan. Olardyń elik atýǵa ruqsat qaǵazy da joq. Brakonerler kinásin tolyq moıyndady. Bul is boıynsha QR QK 337-babynyń 1-bólimi boıynsha «zańsyz ańshylyq jasaǵany úshin» sotqa deıingi tergeý amaldary bastaldy.
Názıra Járimbet,
«Egemen Qazaqstan»
Qostanaı