Elbasy N.Nazarbaev qarasha aıynda ótken Qaýipsizdik keńesiniń otyrysynda tıisti organdar basshylaryna kez kelgen salada baǵany belgilegende tek naryq zańdylyǵyna súıenbeı, halyqtyń jaǵdaıyn da nazarda ustaý kerektigin atap aıtqany belgili. «Tarıf kóterý jónindegi árbir sheshimdi qabyldaǵan saıyn, eń aldymen, halyqtyń tólem qabilettiligin eskergen jón», degen-di Elbasy. Elimizdegi jolaýshylar tasymaly salasyndaǵy ahýal, ásirese mereke kóbeıetin búgingideı kezderdegi jaǵdaı osy máseleniń ózektiligin kúsheıtip otyrǵandaı...
Jeltoqsan aıynda elimizde merekeler qarasy jetkilikti. Osy urymtal sátti paıdalanyp, demalys kúnderi stýdentter úılerine asyǵady, aýyldaǵy aǵaıyn qalaǵa, qalalyqtar aýylǵa jol tartyp, jolaýshylar aǵyny kúrt kóbeıetini zańdylyq. Tıisinshe, eń qoljetimdi ári senimdi kólik poıyz bolǵandyqtan, tasymaldaýshylardyń júktemesi arta túsedi. Alaıda, dál búginde sol poıyzdarda jekelegen óńirlerge bılet atymen joq, barynyń baǵasy sharyqtap ketti. Bul – jylda qaıtalanatyn, jolaýshylardyń qaltasyn qaǵatyn qubylys.
Máselen, Astana men Aqtóbeniń arasy 1,5 myń shaqyrymnan aspaıdy. Al bul óńirge jyl sońynda poıyzǵa bılet tapshy. Árıne bılet onlaın satylatyn resmı saıttarda Astana men Oraldyń arasynda júretin «Talgo» poıyzdaryna sanaýly bılet tur. Biraq baǵasy qymbattap ketken.
Aıtalyq, №095S «Astana Nurly jol» – «Oral» baǵytyndaǵy poıyzdyń 29 jeltoqsan kúngi Aqtóbege deıingi eń arzan (!) bılet quny – 35 138 teńge. Al eń jaıly oryn – 58 540 teńge. Iá, qalypty kúnderi ushaq bıletiniń ózin budan arzanǵa satyp alýǵa bolatyndyǵyn eskersek, «Jolaýshylar tasymaly» aksıonerlik qoǵamy usynǵan baǵalar qarapaıym halyq úshin jaǵa ustatarlyq jaǵdaı. Aqtóbeden arydaǵy Oralǵa da dál osyndaı baǵa belgilengen. Basqa baǵyttarda da baǵa aspandap tur.
Kúni keshe «facebook» áleýmettik jelisinde Irına Bespaeva esimdi qoldanýshy 31 jeltoqsan kúni Astana-Petropavl baǵytyndaǵy bılet baǵasy ádettegi 5 myń teńgeden 14 myń teńgege deıin kóterilip ketkendigin jazdy. Eki qalanyń ara qashyqtyǵy 500 kılometrdiń shamasynda ekendigin eskersek, baǵanyń úsh esedeı qymbattaýyna ne sebep?!
Osy jaǵdaıǵa baılanysty «Jolaýshylar tasymaly» AQ tarapynan resmı jaýap aldyq.
Kompanııanyń klıenttermen jáne buqaralyq aqparat kózderimen jumys atqarý baǵytynyń jetekshisi Danııar Aıdarhanovtyń aıtýynsha, kommersııalyq baǵyttardaǵy bılet baǵasy suranysqa saı óse berýi múmkin jáne oǵan eshqandaı shekteý bolmaıdy. Jalpy, kommersııalyq poıyzdar barlyq quramnyń 20 paıyzyn quraıdy eken.
– Zań boıynsha kommersııalyq baǵyttarǵa baǵany belgileý óz quqyǵymyzda. Sondyqtan osyndaı baǵyttardaǵy bılet azaıǵan saıyn, suranys kóbeıgen saıyn qymbattap, baǵa 35 paıyzdan da asyp ketedi. Kommersııalyq baǵyttarǵa satylatyn bıletterden túsken qarjy tikeleı kompanııanyń damýyna, jańa servıstik qyzmetti endirýge, barlyq vagondar parkin tehnıkalyq jaraqtandyrýdy jaqsartýǵa jáne prosesterdi avtomattandyrýǵa baǵyttalady, – deıdi D.Aıdarhanov.
Osy rette kompanııa ókili poıyz bıletteriniń 45 kún buryn satylymǵa shyǵarylatyndyǵyn jáne erterek alynǵan bılettiń arzan bolatyndyǵyn atap ótti.
– Qazir kóp baǵyttarǵa bıletter joq. О́ıtkeni jolaýshylar aldyn ala satyp alǵan. Bul tek bıylǵy ahýal emes. Sonyń ózinde kompanııa tarapynan jeltoqsan aıyndaǵy merekeler qarsańynda qosymsha 250 vagon shyǵaryldy. Sol arqyly qosymsha 45-50 myńdaı jolaýshyny artyǵymen tasymaldaýǵa múmkindik týdy. Vagondar parki 100 paıyz qoldanysta, – deıdi «Jolaýshylar tasymaly» AQ ókili.
D.Aıdarhanovtyń aıtýynsha, jýyrda ǵana Qostanaı – Almaty baǵytynda qosymsha úsh reıs shyǵarylǵan. Jalpy, 2018 jyldyń 11 qyrkúıeginen «Jolaýshylar tasymaly» AQ elimizdiń barlyq ishki baǵyttaryndaǵy baǵany retteýdiń ıkemdi júıesin engizgenin aıtady. Baǵalardy retteýdiń ıkemdi júıesi dınamıkalyq tarıftik basqarý baǵdarlamasy boıynsha qoldanysqa alynǵan. Bul kóptegen áýe jáne jer ústi tasymaldaýshylar jumysynda keńinen qoldanylatyn álemdik tájirıbe. Bir sózben aıtqanda, jóneltý kúni jaqyndaǵan saıyn bılet baǵasy da óse túspek.
Qalaı desek te, shuǵyl jolǵa shyǵýǵa májbúr jolaýshy dittegen jerine jetýge poıyz kóligin tańdar bolsa, qaltasynyń túbi kórinip qalýy múmkin. Alys-beris, barys-kelisteri demalys, mereke kúnderi jandanatyn halqymyz úshin «Jolaýshylar tasymaly» AQ qoldanyp otyrǵan álemdik tájirıbe qolaısyzdyq týdyrýda.
Serik ÁBDIBEK,
«Egemen Qazaqstan»