Táýelsizdik merekesinen keıin jurtshylyq jańa jylsanaýdyń basy retinde jańa jyldy asyǵa kútetini belgili. Almatylyqtar elimizge qut bolǵan ıt jylyn alǵyspen shyǵaryp salyp, irgemizden enip kele jatqan taǵy bir jyldy qýanyshpen qarsy alýǵa daıyn.
Kóshelerdi kómkergen neshe túrli jarqyraǵan shamdar, shahardy erekshe saltanatqa bólep, kórgen janǵa merekelik kóńil kúı syılap tur. Elimizdegi eń alyp megapolısti jańajyldyq bezendirýge bıyl jergilikti bıýdjetten 75 mln teńge bólinipti. Jaýapty mamandardyń sózinshe, jumsalǵan qarjy kólemi byltyrǵydan az. О́ıtkeni, qala kóshelerine ornatylǵan shyrshalardyń teń jarymy ótken jyldan qalǵan jasandy shyrshalar.
Kóńil qýantarlyǵy sol, shahardaǵy shyrsha úlgisindegi maketter túgeldeı derlik ulttyq oıý-órnektermen kómkerilgen. «Sondyqtan, Elbasynyń «Uly dalanyń jeti qyry» maqalasynda aıryqsha atalǵan ań stıliniń megapolıste jappaı kórinis tabýy tarıhı sananyń qalyptasýyna yqpal etedi» deıdi zııaly qaýym ókilderi.
Qala ákimdigi qoǵamdyq oryndarǵa, ıaǵnı Abaı men eski alań, Atakent pen Tuńǵysh Prezıdent saıabaǵy jáne «Almaty Arena» sport saraıynyń mańyna shyrsha tikken. Budan bólek, qaladaǵy 8 aýdannyń ákimdigi josparǵa saı bekitilgen aýmaqtarǵa árleý jumystaryn júrgizgen.
Shahardyń birneshe jerinde oryn tepken tegin syrǵanaý alańdary turǵyndar úshin bıylǵy qystyń eń bir keremet syıy deýge bolady. Dástúr boıynsha barlyq saýda ortalyqtarynda jeńildikter naýqany júrip jatyr. Myń qulpyrǵan megapolıste qysqy týrızm qyza túsken dersiz. «Medeý» muz aıdyny men «Shymbulaq» shatqaly, arý qalaǵa zaý bıikten kóz tastaǵan kórkem «Kóktóbe» kelýshilerge qushaq ashyp tur.
Arman OKTIаBR,
«Egemen Qazaqstan»
ALMATY