Erterekte saqar qaınatyp, kir sabyn jasapty degendi estýshi edik. Al, qazirgi ýaqytta qoly epsekti adamnyń eshbir tehnologııalyq qurylǵysyz ıis sabyn shyǵarýy ózgeshe óner ekeni daýsyz.
Kókshetaý qalasynda turatyn Elena Samsonova san alýan hosh ıisti sabyndardy 10 jyldan beri jasaıdy eken. Negizgi mamandyǵy – psıholog. Alaıda maqsat etken isinen murat tabatynyna kózi jetken soń osy kásipke kóńili qulaǵan.
– Bári bala kútimine oraı demalysqa shyqqan sátimnen bastaldy,–deıdi Elena Samsonova,– áýeli sabyn daıyndaý tásilderin ǵalamtordan izdep taptym. Birden kóńilimdi aýlaǵany. Indete zerttedim. Birtúrli ańsarym aýyp ketkeni.
Jańa kásip qyzyqty bolyp kóringen. Tipti ózine tartyp, baýrap alyp ketkeni. Qoly jattyǵa kele ıis sabyndardy ártúrli etip qalyptap, qıly pishinde jasaıtyn boldy. Jasaǵan zatyńnyń syrtqy keıpi de jutynyp turýy kerek qoı.
– Túrli-tústi boıaý, ıistendirgish qajet,–deıdi sheber,–sapasy da jaman emes. Eshbir hımııa joq. Negizgi shıkizatyn Reseıden aldyramyn.
Sórede turǵan sabyndar sabyn emes, sanalýan oıynshyqtar tárizdi. Myna bireýi qorbıǵan qonjyq, súp-súıkimdi kúshik, tipti jemis-jıdekter beınesindegileri de tolyp jatyr.
– Elena bul tóńirektegi qoldan sabyn jasaıtyndardyń tuńǵyshy,–deıdi «Palıtra Sınegorıa» birlestiginiń jetekshisi Elena Andronıak,– ózimniń de kishkentaıym bar. Oıynshyq sabynmen jýyndyrsaq sondaı ońaı. Bala qyzyǵady. Bala túgil úlkenderdiń ózin eliktiredi eken.
Qolóner sheberi keleshekte kaosmetıkalyq buıymdar da shyǵarmaq. Nesi bar, qolynan kelýi ábden múmkin.
Baıqal BAIÁDIL,
«Egemen Qazaqstan»
Aqmola oblysy.