Búgingi tańda «Nurly júrek» áleýmettik qyzmet kórsetý ortalyǵynda» KMM aqyl-oıynda aýytqýy bar 273 astanalyqqa áleýmettik kómek kórsetiledi, dep habarlaıdy elorda ákimdiginiń resmı saıty.
Astana qalasynyń ákimi Baqyt Sultanov áleýmettik qyzmet kórsetý ortalyǵynyń jumysymen tanysty. «Balalarǵa tereń jáne jan-jaqty bilim alý kerek. Biz bundaı ortalyqtardy qoldaımyz. Sebebi múmkindigi shekteýli balalardyń qoǵamda óz oryndaryn tapqany óte mańyzdy, olar áleýmettik beıimdelýi tıis. Osy baǵytta «Nurly júrek» ortalyǵy jumysyn durys atqarýda», dedi Baqyt Sultanov.
Ortalyqta balalardy saýyqtyrýǵa barlyq jaǵdaı jasalǵan. Munda sensorlyq bólme, montessorı ádisiniń arnaıy kabıneti, fızıokabınet (LFK), logoped, psıholog, defektolog kabınetteri, áleýmettik – turmystyq beıimdeý bólmesi, lekoteka, kitaphana, art-terapııa kabınet, mýzykalyq zal, tigin, usta sheberhanasy, qysqy baq, oıyn, sport alańy, dene shynyqtyrý zaly, sport alańy bar. Ortalyq mamandary segiz túrli áleýmettik qyzmet túrin kórsetedi. Atap aıtqanda, medısınalyq, turmystyq, psıhologııalyq, pedagogıkalyq, ekonomıkalyq, quqyqtyq, mádenı qyzmetter, eńbek qyzmeti.
Osy jyldyń qańtar aıynda jasóspirimder men jastar korpýsy ashyldy, ondaǵy mańyzdy mindet jumysqa ornalastyrý baǵytynda oqytý. «Buryn biz balalardy úsh jastan 18 jasqa deıin qabyldaıtyn edik, bıyldan bastap 29 jasqa deıingi túrli dıagnozy bar jastarǵa da qyzmet kórsetemiz. Bizde tirek-qozǵalys apparaty buzylǵan 134 bala bar. Olar kútimge, qyzmetterdi alýǵa árdaıym muqtaj. Bilim berý baǵdarlamalarynan bólek, biz balalarymyzdy ózine-ózi qyzmet etý, ózine kútim jasaý daǵdylaryna, qorshaǵan ortada durys baǵyt alý, aınalasyndaǵy adamdar men durys qarym qatynas jasaýdy úıretemiz. Sondaı-aq, balalar eseıgen saıyn olardy eńbekke mashyqtandyramyz», - dedi ortalyq dırektory Serik Bópejanov. Ortalyqtyń tárbıelenýshileri sport ortalyqtaryna, mádenı is-sharalarǵa, sırk, kınoteatrlarǵa, oıyn-saýyq ortalyqtaryna, konsertterge barady. «Men bizdiń ortalyq qyzmetkerlerine jáne ákimge alǵysymdy aıtqym keledi.
Bizdiń balalarymyz 18 jastan keıin de dalada qalmaıtynyna rızamyn. Bul ata-analarǵa kórsetiletin óte úlken qoldaý, kómek. Mine, osy jyly 18-29 jas aralyǵyndaǵy eresekterge arnalǵan korpýs ashyldy. Meniń balam jeti jasynan osy ortalyqqa keledi. Ol 18 –ge tolǵanda Ne isteımiz? suraq mazalady. Qazir meniń qyzymdy sýret salýǵa, tigýge úıretip jatyr. Bizge osy ortalyqtyń ár qyzmetkeri týysymyzdaı bolyp ketti», - dep bildirdi óz alǵysyn «Nurly júrek» ortalyǵynda tárbıe alyp jatqan balanyń ata-anasy. Búgin «Invataksı» aýqymdy áleýmettik jobasynyń sheńberinde «Halyq» qaıyrymdylyq qory men Qazaqstan Halyq bankiniń atynan «Nurly júrek» áleýmettik qyzmet kórsetý ortalyǵyna múmkindikteri shekteýli azamattardy tasymaldaýǵa múmkindik beretin arnaıy kóliktiń kilti tabys etildi.