Bıyl Qaraǵandy sportynyń qarashańyraǵy – Nurken Ábdirov atyndaǵy sport saraıy irgetasynyń qalanǵanyna 60 jyl toldy. Búgingi kúnde ishi-syrty túgel jóndeýden ótken bul ǵımarattyń ekinshi tynysy ashylyp, Arqa sportynyń damýyna burynǵydan da zor úles qosyp keledi.
Taıaýda osy sport saraıynda Qaraǵandy oblystyq dene shynyqtyrý jáne sport basqarmasynyń sporttyq jetistikter murajaıy ashyldy. Ǵımarattyń ekinshi qabatyndaǵy jańa mýzeıge olımpııalyq bes shyǵyrshyqtyń túsine sáıkes keletin bes stend ornalastyrylǵan. Al stend sórelerine Qaraǵandy sportynyń dańqyn shyǵarǵan chempıondardyń, áıgili sportshylardyń medaldary men kýboktary jáne basqa da júldeleri, jeke zattary qoıylǵan. Olardyń arasynan, tipti 1956 jylǵy marapattar da oryn alypty.
– Qaraǵandy sportynyń tarıhy men dástúri óte baı. Sondyqtan, bul murajaıdyń ashylýyn ótkenge degen zor qurmet retinde qabyldadym. Jastar aǵa býyn ókilderiniń sporttaǵy jeńisteri men jetistikterin osy mýzeı arqyly tanyp ósse, munyń ózi urpaq tárbıesin damytýǵa qosylǵan mańyzdy sharýanyń biri dep sanaımyn, – deıdi sport ardageri, áıgili bapker Dıhanbaı Bıtkózov.
Qazirgi tańda Qaraǵandy oblysynda sporttyń 96 túrin damytý jolǵa qoıylǵan. Murajaıǵa eksponat tańdaǵanda komıssııa músheleri osy sport túrleriniń barlyǵyn da nazardan tys qaldyrmaýǵa tyrysqan eken. Mysaly, bul jerde Olımpıada chempıony Vasılıı Jırovtyń bylǵary qolǵaby, ataqty boksshy Serik Eleýovtiń, jeńil atlet Sergeı Zasımovıchtiń músinsheleri, fýtbolshy Andreı Fınonchenkonyń sporttyq jeıdesi jáne basqa da sport sańlaqtaryna tıesili eksponattyq zattar bar.
Qaırat ÁBILDA,
«Egemen Qazaqstan»
Qaraǵandy