Asyrap alynǵan jáne ata-ana qamqorlyǵynsyz qalǵan balalar Jańa jyl qarsańynda eleýsiz qalmady. «Januıa» balalardy asyrap alý ortalyǵy men bala asyrap alýshy ata-analar birlese otyryp, Jańa jyl merekesin ótkizdi.
Úsh jyl buryn qaıyrymdy jandardyń bastamasymen Kókshetaý qalasynda «Januıa» balalardy asyrap alý ortalyǵy ashylǵan bolatyn. Balalarǵa ata-ananyń aıaly alaqanynyń jylýyn sezdirgen bul ortalyqtyń maqsaty otbasyn tabýǵa kómektesý jáne tolyqqandy ómirge beıimdeý.
– Balalarǵa esten ketpes kesh uıymdastyrýǵa tyrystyq. Sebebi, balalar jylyna bir-aq ret keletin Jańa jyl keshin asyǵa kútedi. Osyndaı merekelik is-sharalar arqyly balalardy kópshilikke kórsetip otyrsaq, olar óz otbasylaryn taýyp qalar degen úmittemiz. Ár bala ǵajaıypqa toly Jańa jylda janynda jaqyndary bolǵanyn armandaıdy, –deıdi «Analar úıi» qoǵamdyq birlestiginiń aımaqtyq ókili Quralaı Jumabekova.
Iá, balalar jańa jylda shynymen ǵajaıypqa senedi. Aıaz ataǵa hat jazyp, armandarynyń oryndalýyn asyǵa kútedi. Ata-ananyń qamqorlyǵynsyz qalǵan balalardyń jańa jyldy jaqsy qarsy alýyna demeýshiler baryn saldy.
–Eń bastysy, balalardyń júzinen kúlki ketpeı, qýanyp júrse bolǵany. Biz sol maqsatta balalarǵa kóptegen syılyqtar men táttiler alyp keldik. Barlyǵy bala qýanyshy úshin. Maǵan ózime qaıyrymdylyq jasaý isi unaıdy, – deıdi jeke kásipker Gúlmıra Tasenova.
Merekelik keshke Shýchınsk qalasyndaǵy balalardy qoldaý ortalyǵynyń tárbıelenýshileri men Kókshetaý qalasyndaǵy jasóspirimderdi beıimdeý ortalyǵynan asyrap alynǵan balalar qatysty. Tańǵajaıyp merekelik keshke balalardyń da daıyndyǵy erekshe muqııat boldy.
Uıymdastyrýshylar balalarǵa arnap «Jańa jyldyq kaleıdoskop» atty oıyn baǵdarlamasyn usyndy. Balalar sabyn kóbikterinen jasalǵan shoýdy erekshe unatyp, saıqymazaqtarmen kóńildi oıyndar oınady. Kesh sońynda balalar jańa jyldyq syılyqtarǵa ıe boldy.
Baıqal BAIÁDIL,
«Egemen Qazaqstan»
Aqmola oblysy.