Kókshetaýdaǵy arnaıy túzetý mektep-ınternatynyń oqýshylary jańa jyl merekesin janashyrlyqty sezinip, jaqsylap qarsy alýda.
Jeke kásipker Norık Ashotovıch on jyldan astam ýaqyt boıy osy mekemeneiń balalaryna qamqorlyq jasap keledi. Bıyl da sol jaqsy ádetinen jańylmaı, qýanysh syılady. Ádemi oıynshyqtar, dámi til úıiretin tátti-dámdiler syılady. Al, qyzyqqa kenelgen balalar bolsa aıaz ataǵa ózderi jattap kelgen óleń-jyrlaryn oqyp, áýelete án salyp berdi. Ertegi keıipkerleri bala qııaldy baýrap, sıqyrly álemge súńgitse, mektep ujymy daıyndaǵan konserttik baǵdarlama merekege saı mazmundy boldy.
– Meıramhana ıesi Norık Ashotovıch sondaı bir izgi jan,–deıdi mektep-ınternat dırektory Olga Gýrdınskaıa,–jaqsylyq balań kóńilde jattalyp qalady ǵoı, olar da ósken kezde ózgege meıiri túsip jaqsylyq jasaýǵa umtylyp turady.
Oıynshyqtar óz aldyna demeýshi mektep-ınternat oqýshylaryna teledıdar tartý etti.
– Jańa jyl barlyq balalarǵa jaqsylyq ákelsin,–deıdi mektep-ınternat oqýshysy Erkemaı Dáken,–densaýlyqtary myqty bolsyn.
Bala tileginen baǵaly ne bar?!
Baıqal BAIÁDIL,
«Egemen Qazaqstan»