Atyraýda sportshylar baly ótip, 18 atalym boıynsha oblys úzdikteri anyqtaldy, dep xabarlaıdy Atyraý oblysynyń О́ńirlik kommýnıkasııalar qyzmeti.
Oblysta jyl saıyn dástúrli túrde úzdikterdi qorytyndylaıtyn sharaǵa respýblıkadaǵy sport salasynyń maıtalmandary jınaldy. Sharany saltanatty túrde ashqan oblys ákimi el maqtanyshyna aınalǵan jerles sportshylarǵa atyraýlyqtar atynan alǵys bildirdi.
- Sizderge qarap osy jastar boı túzeıdi, sportpen aınalysqysy keledi. Jetistikterińizdi kórip sizder sııaqty bolýǵa talpynady. Arttaryńyzdan ergen kóptegen ini-qaryndastarymyz da bastaǵan isti abyroıly jalǵastyryp kele jatyr. Oblystyń sport salasyndaǵy jetistikterin qysqasha tamashaladyq. Bul bir ǵana bóligi. Biz óz sportshylarymyzdy quttyqtaımyz. Alda talaı jetistikke jetip, oblys qana emes, el maqtanyshyna aınalýlaryńyzǵa tilekshimiz jáne árdaıym qoldaý bildiremiz,- dedi Nurlan Noǵaev.
Sonymen qatar aımaq basshysy úzdikterge Qazaqstan Respýblıkasy Mádenıet jáne Sport mınıstrliginiń Tósbelgisin jáne oblys ákiminiń Alǵys hatyn tabystady. Sondaı-aq, «Jyl sportshysy» men «Jyl jattyqtyrýshysyn» anyqtady. Bıyl "Jyl sportshysy" bolyp Djakarta qalasynda ótken Parajúzýden eki altynǵa ıe bolǵan Halyqaralyq dárejedegi sport sheberi Erjan Sálimgereev atansa, "Jyl jattyqtyrýshysy" karateden oblystyq jastar komandasynyń jattyqtyrýshysy Bolat Izbasqanov boldy.
Merekelik jıynda Jaqsylyq Úshkempirov, Ermahan Ibraımov, Bolat Temirov, Maksım Rakov, Aıbek Nuǵymarov, Sport ardageri Aqmyrza Batyrhaıyrovtar quttyqtaý sóz sóılep, «Eń úzdik jas sportshy», «Jyl serpilisi», «Eń úzdik jasóspirim sportshy», «Úzdik federasııa», «Sport janashyry», «Úzdik sporttyq ákim»,«Úzdik sport seriktesi», «Úzdik sporttyq basshy», «Úzdik sporttyq bólim», «Úzdik buqaralyq-sporttyq shara», «Úzdik sport ardageri», «Úzdik komanda», «Úzdik sporttyq uıym», «Úzdik sport jańalyqtarynyń sholýshysy», «Úzdik sporttyq joba», «Úzdik sport tilshisi» nomınasııalarynyń jeńimpazdaryn anyqtady.
Atyraý oblysy Dene shynyqtyrý jáne sport basqarmasynyń basshysy Rınat Ibragımov sport janashyrlaryna basqarmanyń Alǵys hatyn tabystady.
Sport balyna qatysqandar oblysymyzdyń sportshylary respýblıkalyq jáne halyqaralyq jarystarda ıelengen 300 kýbokten turǵyzylǵan jańa jyldyq shyrshany tamashalady.