Almaty oblysynyń Talǵar aýdanyna qarasty Jańalyq aýylynda saıası qýǵyn-súrgin qurbandaryna arnalǵan mýzeı paıdalanýǵa berildi.
Qyzyl terrordyń qandy qylyshyna ilikken 4 myńnan astam jazyqsyz qurban osy Jańalyq aýylynyń mańyna kómilgen eken. Almatydan 40 shaqyrym qashyqtyqtaǵy aýyldyń mańy 1938 jyldary «úshtiktiń» sheshimimen atylǵan adamdardy jerleıtin orynǵa aınalypty. 1988 jyldan saıası qýǵyn-súrgin qurbandaryn aqtaý jumystary bastalǵanda bul mańǵa kómilgen jazyqsyz jandardy eske alý isi de qolǵa alynǵan bolatyn. Al Táýelsizdiktiń alǵashqy jyldarynda «Ádilet» qoǵamynyń muryndyq bolýymen Jańalyq aýylynda memorıaldy eskertkish kesheni turǵyzylyp, repressııa qurbandaryna mýzeı ashý maqsaty turdy. Alaıda, saıası qýǵyn-súrgin qurbandaryna arnalǵan mýzeı araǵa 20 jyldan astam ýaqyt salyp, bıyl qoldanysqa berildi.
Almaty oblysy ákimdiginiń qoldaýymen bastalǵan qurylys jumystaryna 288 mln teńge qarajat bólingen eken. Bir jyl ishinde salynǵan mýzeıdiń jalpy aýmaǵy 535 sharshy metrdi quraıdy. Mýzeıdiń ekspozısııalyq zalynda ult qaıratkerleri týraly materıaldar qoıylyp, osy jerde jerlengen 4 myńnan asa saıası-qýǵyn súrgin qurbandarynyń aty-jónderi tas taqtaǵa oıylyp jazylǵan.
- Bul mýzeı osydan 20 jyl buryn salynýy kerek edi. Memleket Basshysynyń «Bolashaqqa baǵdar: Rýhanı jańǵyrý» atty maqalasy jaryq kórgennen keıin Almaty oblysynyń ákimdigi mýzeıdiń qurylysyn qolǵa aldy. Osy jerdiń topyraǵyn 1930 jyldardaǵy qazaqtyń sút betindegi qaımaqtary, Alash qaıratkerleri, zııaly qaýym ókilderi jamylyp jatyr. Olardyń barlyǵy jazyqsyz, ultyna, eline, jerine adal bolǵany úshin atylǵandar, deıdi «Ádilet» qoǵamdyq birlestiginiń tóraǵasy Ǵarıfolla Ánes.
Qalmahanbet MUQAMETQALI,
«Egemen Qazaqstan»
Almaty oblysy