Almatyda bıatlonnan Qazaqstan chempıonaty ótip jatyr. Jarystyń alǵashqy kúni tartysty ótti, dep habarlady Ulttyq Olımpıada komıtetiniń baspasóz qyzmeti.
Sprınterler jarysy jankúıerler men bapkerler úshin asa qyzyqty ótti. Qyzdar arasyndaǵy tartysty básekede 22 mınýt 33 sekýnd kórsetkishimen Anastasııa Kondrateva (Aqmola oblysy) jeńimpaz atandy. Ol nysana kózdeýde múlt ketken joq. Kúmis júlde ShQO ókili Elızaveta Belchenkonyń, qola júlde qaraǵandylyq Lıýdmıla Ahatovanyń enshisinde. Jasóspirimder arasynda úzdikter úshtigin Evgenııa Krasıkova, Arına Sheshýkova jáne Polına Egorova qurady.
Al erler arasyndaǵy sprıntte Vladıslav Kıreevtiń (Qaraǵandy oblysy) kórsetkishi bárinen joǵary boldy. Ol belgilengen qashyqtyqty 27 mınýt 22 sekýndta júrip ótken. Nysana kózdeýde de Kıreevtiń upaıy túgel. Jeńimpazdan 19 sekýndqa utylǵan Tımýr Kýs (Pavlodar oblysy) kúmis júlde ıelense, Roman Eremın (Aqmola oblysy) qola medalǵa qol jetkizdi.
Álı BITО́RE,
«Egemen Qazaqstan»