Elbasy Nursultan Nazarbaev jýrnalısterge bergen suhbatynda Eýrazııalyq ekonomıkalyq odaq aıasyndaǵy saýda-ekonomıkalyq kórsetkishtiń jaqsarǵanyna toqtaldy.
«Qazaqstanda 2014 jyly qurylǵan Eýrazııalyq ekonomıkalyq odaq birden qıyn jaǵdaıǵa tap boldy. Dál sol kezde daǵdarys shyrqaý shegine jetken edi. Soǵan qaramastan qazirgi tańda Eýrazııalyq ekonomıkalyq odaqqa múshe memleketter arasyndaǵy taýar aınalymy 24,5 paıyzǵa ósti. Árıne, onyń 90 paıyzy Qazaqstan men Reseı arasyndaǵy saýda-sattyqqa tıesili. Odaqqa múshe memleketterdiń arasyndaǵy taýar aınalymy kóbeıip keledi jáne bárine tıimdi ekenin kórsetti», dedi N.Nazarbaev.
Prezıdent saýda-ekonomıkalyq kórsetkishtiń jaqsarýyna Kedendik odaqtyń oń yqpal tıgizip otyrǵanyn atap ótip, mundaı bastamalar kórshi memlekettermen tıimdi qarym-qatynas ornatýǵa múmkindik beretinin jetkizdi.
«Qazaqstan men Reseı arasyndaǵy qarym-qatynas – áriptestiktiń jarqyn úlgisi. Mınıstrlik deńgeıdegi, vedomstvoaralyq kezdesýler ótip turady. Qazaqstan Reseıdiń 70-ke jýyq óńirimen saýda-sattyq baılanys ornatqan. Bizdiń oblystarymyz tikeleı Reseıdiń aýdandaryna shyǵa alady. Oǵan qosa, eki elge ortaq kásiporyndar óte kóp. Kólik qurastyrý, aýyl sharýashylyǵy, energetıkalyq sala boıynsha áriptestik nyǵaıyp keledi», dedi Elbasy.
N.Nazarbaevtyń sózine qaraǵanda, alda-jalda eki el arasynda qandaı da bir másele týyndasa, onyń oń sheshimin tabýdyń múmkindigi bar.
«Kórshi memleketterde keıde túsinispeýshilik bolýy zańdylyq. Áıtse de, onyń bári mınıstrlik, vedomstvolyq deńgeıde tez sheshimin tabady. Qazirgi tańda Reseı de, Qazaqstan da dostyq qarym-qatynas ustanǵan.