Qazaqstan Prezıdenti Nursultan Nazarbaev BAQ ókilderimen kezdesip, Qazaqstan-Qytaı qarym-qatynasyna baılanysty jýrnalısterdiń suraǵyna jaýap berdi.
«Qytaı men Qazaqstannyń qazirgi qarym-qatynasy joǵary deńgeıde. Qytaıdan qorqatyn dáneme de joq. Bul dúnıe degen tarıh bizden bastalyp, bizden aıaqtalǵan joq. Qytaıdan qaýiptenip, jalań aqparat taratý durys emes. Qytaılardyń jappaı Qazaqstanǵa kóship kelip, qonystanyp jatqany joq. Elge keletinderdiń barlyǵy zań aıasynda kelisilgen. Mysaly, óndiris salatyn bolsa Qytaıdan 500 adam keledi, zaýyt bitken soń 500 adam elderine qaıtady. Bul kelisilgen másele. Qytaılar tek bizdiń elimizde ǵana emes, búkil álemde bar. Qaı elge barsań da «China Town» bar. Al qytaılardyń mundaı shoǵyry bizdiń elimizde joq deýge bolady», dedi Elbasy.
Sondaı-aq Prezıdent kórshilerimizben tatý bolyp, saýda-sattyq qarym-qatynasymyzdy arttyrý kerek ekenin aıtty.
«Qazirgi tańda Qytaı álemdegi Amerıkadan keıin órkendegen elder qatarynda ekinshi orynda tur. Tehnologııa jaǵynan da eshbir elden kem emes. Barlyq salada da Qytaı memleketi ozyp ketpese, artta qalyp qoıǵan joq. Sondyqtan kórshilerimizben dostyq qatynas ornatyp, saýda-sattyq jasaýymyz kerek. Jalpy, aıtqanda, Qytaıdan bizge eshqandaı qaýip joq. Sondyqtan dostyq qarym-qatynasymyzdy ary qaraı jalǵastyra beremiz», deıdi Memleket basshysy.