Astana qalasynyń ákimdigi «Nurly jer» jáne «7-20-25» baǵdarlamalary aıasynda jergilikti bıýdjetten muǵalim, dáriger jáne polısııa qyzmetkerlerine 100 mıllıon teńge bóldi. Bıýdjettik mekemelerde jumys isteıtin 100 qyzmetkerge 1 mıllıon teńgeden úlestirilgen bul qarajat Turǵyn úı qurylys jınaq banki arqyly páter alý úshin alǵashqy jarna retinde paıdalanylady.
Elbasy Joldaýynda aıtylǵan kópshiliktiń baspanaǵa qoljetimdiligin arttyrýdy kózdegen ıgilikti jobany elorda ákimdigi men Turǵyn úı qurylys jınaq banki birlesip júzege asyryp otyr. Turǵyn úı sertıfıkattaryn tabystaǵan qala ákimi Baqyt Sultanov jeńildikke ıe bolǵan 100 turǵynnyń jaıdan-jaı tańdalmaǵanyn, olardyń barlyǵy óz salasyna eńbegi sińgen bilikti mamandar ekenin jetkizdi.
«Elbasy jergilikti bıýdjetten jeńildetilgen ıpoteka boıynsha alǵashqy jarnany jartylaı sýbsıdııalaý joldaryn qarastyrýdy buıyrdy. Bul ıpotekanyń qoljetimdiligin arttyrady. Biz qarajatty búgingi tańda qalanyń damýyna asa qajetti mamandyq ıelerine bóldik. Bizdiń elorda ómir súrý úshin eń qaýipsiz jáne jaıly bolýy kerek. Sondyqtan bilim, densaýlyq saqtaý jáne quqyq qorǵaý salasyn damytýǵa tıispiz. Áleýmettik saladaǵy qyzmetkerler de nazardan tys qalmaıdy», dedi shahar basshysy B.Sultanov.
Bólingen aqshalaı qarajat salymshylarǵa alǵashqy jarnanyń 20%-yn tez jınaqtaýǵa kómektesedi. TQJB 7%-dan aspaıtyn jyldyq mólsherlemede nesıe beredi. Qaryzdyń maksımaldy merzimi 25 jyl, al nesıe somasy 20 mln teńgeden aspaýy qajet. Qarjy Turǵyn úı qurylys jınaq bankine bólingennen keıin áleýmettik kómekti alýshyǵa baspana tańdap, onyń ıesi bolýyna úsh aı ýaqyt beriledi. «Salymshy alǵashqy jarna retinde jalpy somanyń 20 paıyzyn jınaýy tıis. Sodan keıin 7 paıyzdy ıpoteka 25 jylǵa beriledi. Biraq páterdi úsh aıdyń ishinde taýyp, ıpotekany rásimdep alý qajet. Úı jańa turǵyn úıden alynýy shart. Áıtpese, ákimdiktiń aqshasy bıýdjetke keri qaıtarylady. Ázirshe, bul aqsha arnaıy esepshotta jata beredi. Barlyq shart oryndalǵannan keıin esepshot ashylady da alǵashqy jarna retinde salymshynyń qarjysyna qosylady», deıdi «Turǵyn úı qurylys jınaq banki» Astana qalasyndaǵy ortalyq fılıalynyń dırektory Jansultan Mataev.
Sertıfıkatqa ıe bolǵan №44 orta mekteptiń tarıh pániniń muǵalimi Nurjamal Jaqypova alǵashqy jarnaǵa qarajatty 2,5 jyl boıy jınaǵanyn aıtty. «Osy naýqannyń nátıjesinde biz ózimizge qajetti baspanaǵa ıe bolýǵa múmkindik aldyq. Bizde Turǵyn úı qurylys jınaq bankinde depozıt bar. Alǵashqy jarna mıllıon teńgege artqanynyń nátıjesinde endi biz eki bólmeli páter ala alamyz. Osyndaı qoldaý kórsetken ákimdikke rızamyz!», dedi ol.
Maıgúl SULTAN,
«Egemen Qazaqstan»