Batys Qazaqstan oblysynyń ákimi Altaı Kólginov 2019 jyldyń alǵashqy jumys kúnin keshe ǵana Elbasy Jarlyǵymen Báıterek bolyp ózgergen aýdannyń ortalyǵy Peremetnoe aýylynda el-jurtpen kezdesýden bastady.
Aýdandyq tarıhı-ólketaný mýzeıinde aýdan aktıvimen, máslıhat depýtattary, jastar uıymdarymen kezdesken óńir basshysy jınalǵan jurtty Elbasy Jarlyǵymen tanystyryp, jańa jyldy jańa ataýmen bastap otyrǵan aýdan halqyn quttyqtady.
– Zelenov aýdany – Oral qalasynyń azyq-túlik beldeýine jatatyn, óndirisi men aýyl sharýashylyǵy damyǵan óńir. Bul jerdiń qazaq tarıhyndaǵy orny da mańyzdy. Aýdannyń ótkeni men búgini, tereń tarıhy týraly osy mýzeıden de kórip otyrmyz. О́zderińiz bilesiz, ótken jyly osy óńirdiń jastary aýdan ataýyn ózgertýdi usyndy. Ony halyq qoldady. Endi, mine, el-jurttyń tilegin Elbasy da oryndap, aýdan ataýyn – Báıterek aýdany dep ózgertýge Jarlyq shyǵaryp otyr, – dedi Altaı Kólginov.
Aıta keteıik, byltyr qyrkúıek aıynda Batys Qazaqstan oblystyq máslıhatynyń kezekti sessııasynda Zelenov aýdanyn Báıterek aýdany dep ataý máselesi qaralǵan edi. Batys Qazaqstan oblystyq tilderdi damytý basqarmasynyń basshysy Aıgúl Myńbaeva Zelenov aýdanyndaǵy barlyq 22 aýyldyq okrýgte jáne aýdan ortalyǵynda osy másele talqylanyp, qoǵamdyq tyńdaý kezinde kópshilik tarapynan qoldaý tapqanyn aıtqan bolatyn. Kópshilik uıǵarymy oblystyq máslıhat sessııasyna qatysqan depýtattar tarapynan da qoldaý tapty. Sóıtip usynys Astanaǵa jiberilgen.
– Jańalyqty aýdan halqy qýanyshpen qarsy aldy. El-jurttyń tilegi eleýsiz qalmaı, Elbasy arnaıy Jarlyq shyǵaryp, aýdanymyzdyń ataýy Báıterek bolǵanyna qýanyshtymyz, – deıdi aýdandyq tarıhı-ólketaný mýzeıiniń dırektory, aýdandyq máslıhat depýtaty Nurjan Dúzbatyr.
Zelenov aýdany bólek ákimshilik qurylym retinde 1939 jyly qurylǵan. 1997 jyly aýdan quramyna Prıýralnyı aýdany kirdi, jalpy aýmaǵy – 7,4 myń sharshy shaqyrymdy quraıdy. Ortalyǵy Peremetnoe aýyly oblys ortalyǵy Oral qalasynan 38 shaqyrymda ornalasqan. Aýdanda 22 aýyldyq okrýg, 68 aýyldyq eldi meken bar, aýdan halqy 60 myńnan asady. Zelenov aýdany Batys Qazaqstan oblysynyń soltústiginde, Qazaqstan Respýblıkasynyń memlekettik shekarasyn boılaı ornalasqan. Reseı Federasııasynyń 3 oblysymen – Orynbor oblysynyń Pervomaı, Tashla aýdandarymen, Samara oblysynyń Bolshechernıgov aýdanymen jáne Saratov oblysynyń Ozınkı, Perelıýb aýdandarymen shektesedi.
Qazbek QUTTYMURATULY,
«Egemen Qazaqstan»