Oral qalasynda 126 páterlik 9 qabatty jańa úı paıdalanýǵa berildi. Burynǵy apatty úıdiń ornyna kóterilgen, memleket pen jekemenshiktiń áriptestigi negizinde salynǵan bul úıdiń 12 páterine osy jerdegi kóne úıdiń turǵyndary tegin kirip otyr.
Tozyǵy jetken, apatty úıler – kez kelgen qala basshysynyń bas aýrýy. О́ıtkeni ondaı ǵımarattar shahar sánin buzǵanynan bólek, úı turǵyndaryn baspanamen de qamtamasyz etý kerek. Úırenshikti úı, baýyr basqan aýdanynan ketkisi kelmeıtin adam kóńili taǵy bar. Osynyń bári Oral qalasynda oraıymen sheshilip jatyr. Apatty úılerdi aýystyrýdyń oraldyq tájirıbesi búginde elimizdiń barlyq óńirine usynylýda.
О́tkenge kóz salsaq, 2016 jyly Oral qalasynda tozyǵy jetken, qulaǵaly turǵan 52 úı bolatyn. Onda 1448 otbasy alań kóńil bolyp turyp jatty.
Elimizde memleket pen jekemenshiktiń áriptestigi baǵdarlamasy qolǵa alynǵan tusta tyń ıdeıa týdy: Qalanyń qaq ortasynda, kommýnıkasııa jelilerin tartýǵa shyǵyn ketpeıtin yńǵaıly jerde turǵan apatty úıdi qıratyp, ornyna jańa ǵımarat turǵyzýdy qurylys kompanııalary qoldap alyp ketti. Úı turǵyndary ýaqytsha, qurylys aıaqtalǵansha basqa jerde tura turady, olardyń baspana jaldaý shyǵynyn jergilikti atqarýshy organdar nemese qurylys kompanııasynyń ózi kóteredi. Jańa úı salynyp bitken soń ol turǵyndar óziniń burynǵy páter kólemine saı baspanaǵa tegin ıe bolady. Qalǵan páterlerdi kompanııa ózi satady. Eki jaqqa da tıimdi degen osy emes pe?!
Mine, sońǵy tórt jyl ishinde Oralda osyndaı 11 apatty úı súrilgen eken. 113 páterdiń turǵyndary basqa jerge kóshirilip, kóne úı oryndarynda qurylys qaınap jatyr. Eki úı qurylysy aıaqtalyp, jańa turǵyndaryn taýyp ta úlgerdi: 2017 jyly Depo kóshesindegi №18-úıdiń qurylysy bitip, 16 otbasy jańa páter kiltin alsa, ótken jyly 2-shaqyrym kóshesinde de kóne úıdiń ornyna jańa ǵımarat boı kóterip, apatty úıdegi 32 otbasy jańa páterge kóshti. Sóıtip, eki jylda Oral qalasy ákimdiginiń baspana kezeginde turǵan apatty úılerdiń 48 turǵyny páterin jańartyp aldy.
Búgin paıdalanýǵa berilgen 9 qabatty, 126 páterlik záýlim úıdiń ornynda 12 páterlik jertaban úı boldy deýdiń ózi qıyn.
- Memleketimiz táýelsizdik alǵannan bastap Elbasymyzdyń parasatty saıasaty arqasynda ekonomıkalyq, saıası, áleýmettik jetistikterge jetýde. Elbasy Nursultan Ábishuly Nazarbaev Qazaqstan halqyna joldaǵan «Qazaqstandyqtardyń ál-aýqatynyń ósýi: tabys pen turmys sapasyn arttyrý»Joldaýynda elimiz úshin mańyzdy mindetterdi júktep, elimizdiń damýy men ekonomıkalyq ilgerleýine barsha qazaqstandyqtarǵa jol kórsetip berdi. Búgingi kúnde júzege asyrylyp kele jatqan memlekettik baǵdarlamalar men jobalar sheńberinde azamattardy jumyspen qamtý, turǵyn úıge qol jetkizý, óz áleýetin júzege asyrý úshin barlyq jaǵdaı jasalǵan. Búgingi shara osynyń dáleli, - dedi jańa úıdiń páter kiltin tabys etýge arnalǵan saltanatty sharada Batys Qazaqstan oblysynyń ákimi Altaı Kólginov.
О́ńir basshysynyń aıtýynsha, turǵyn úı qurylysy – Qazaqstan damý strategııasynyń basty baǵyttarynyń biri jáne jalpyulttyq mánge ıe mańyzdy jumystar qatarynda.
Joǵaryda aıtqanymyzdaı, Elbasynyń «Bes áleýmettik bastamasyn» júzege asyrý aıasynda 7-20-25 baǵdarlamasy Oral qalasynda birtindep iske asyrylýda. «Karavannyı pýt» qurylys kompanııasy búgin tapsyryp otyrǵan 126 páterlik turǵyn úı 11 aıdyń ishinde salynyp bitken. Ol «Nurly jer» ınfraqurylymdy damytý memlekettik baǵdarlamasy boıynsha apat jaǵdaıynda turǵan úıdiń páter ıelerine, turǵyn úı kezeginde turǵan otbasylarǵa jáne «Turǵynúıqurylysjınaqbanki» salymshylaryna beriletin boldy.
Paıǵambar jasynan asqan О́tegen Sultanǵalıev aqsaqal buryn Oral et kombınatynda dáriger bolyp qyzmet etken eken. О́zi de, jary da zeınet demalysyna shyqqan qarııalar osy jerdegi kóne páterde úsh bala tárbıelep ósiripti. Búgin apatty úı ornynda boı kótergen sý jańa úıdiń №102 páteri О́tegen Aıýpulyna tıip, erekshe qýanyshty.
Búginde Oral qalasynda osyndaı kóppáterli 5 úı salynyp jatyr. Ol úılerdiń qurylysy 2019-2020 jyldary aıaqtalmaq.
«Bolashaqta qulaǵaly turǵan 7 kóne úıdegi 76 páter turǵyndary da osyndaı jolmen jańa baspanaǵa ıe bolady» deıdi oblystyq qurylys basqarmasy mamandary.
Qazbek QUTTYMURATULY,
«Egemen Qazaqstan»
Batys Qazaqstan
Sýretti túsirgen Temirbolat TOQMÁMBETOV