Jeksenbi, 17 maýsym 2012 0:40
«Jaman syryn aıtamyn dep, shynyn aıtady» demekshi, mende qazirgi ózimizdiń kún kórip otyrǵan bıznes symaǵymyzdyń jaı-japsaryn jaıyp salaıyn dep otyrmyn.
Mardymsyz tirlik keship júrgenimde, jyǵylǵanǵa judyryq, bir sozylmaly keselge ushyrap aýrýhanada aılap jatýǵa týra keldi.
Jeksenbi, 17 maýsym 2012 0:40
«Jaman syryn aıtamyn dep, shynyn aıtady» demekshi, mende qazirgi ózimizdiń kún kórip otyrǵan bıznes symaǵymyzdyń jaı-japsaryn jaıyp salaıyn dep otyrmyn.
Mardymsyz tirlik keship júrgenimde, jyǵylǵanǵa judyryq, bir sozylmaly keselge ushyrap aýrýhanada aılap jatýǵa týra keldi.
Alǵashqyda kóńil surap kelgen aǵaıyndardyń ákelgenderine kóńil bólmeıtinmin. Birde olar ákelgen alma ataýlyny jıystyryp áıelime berip jibergenmin. Ertesinde áıel: «Keshegi almalaryń onbes kılogramnan asyp jyǵyldy…» deıdi. Túsinbegen maǵan: «Satyp, dári-dármek ákeldim. Úıdiń de páteraqysyn tóleýge jetti» dedi de: «Ákelgenderdiń qolyn qaqpa, ne ákelse de jıystyra ber» dep qytaıdyń nán eki-úsh qabyn tastap ketti.
Qarǵa tamyrly qazaq emespiz be, aınalaıyn aǵaıyn-týys, jekjat-juraǵat bar, oıpyr-aı, túske deıin úsh-tórtteý, tústen keıin bes-altaý kelip… al senbi, jeksenbi biri ketip, kelesisi kelip, kún balasy tynym kórmeımin… Kelgen ataýly qurqol kelmeıdi. «Aýrýyna alma sep» dep áıel aıtqan bolýy kerek, jatqan tósegimniń asty almaǵa toldy.
Áıel de yldym-jyldym, keshtetip kelip teńdep tıep, taıyp otyrady.
Áıeldiń deýimen bolýy kerek, almadan bólek almurt, qaýyn sııaqty jemis-jıdekterde kele bastady.
Basynda yńǵaısyzdanýshy edim, kelinshektiń keshegiler pálen qarajat boldy, ony óıttim-búıttim degenin estip… keıingi kezde kóz qıyǵym birden kelgenderdiń dorbasyna túsetin bolyp aldy…
Aýyl poıyz jol torabynda bolǵandyqtan, áıel satar zatyn ary-beri ótkenderge ilezde-aq úlestirip úlgeredi.
Ne kerek, aýrýym sozylmaly bolǵandyqtan alty aı jatsam da zerikpedim… Áıeldiń arqasynda shaǵyn jeke bólme buıyryp, tońazytqysh pen teledıdar da kirgizip berdi.
Birde kóńil surap kelip otyrǵan quda: «Qudaǵı aıtqan on qap kártóshkeni qattap daıyndap qoıdyq» degeninde úndeı almaı, ketken soń áıelge: «Kártóshkiń ne?!» desem: «Saǵan eskertýdi umytyppyn ǵoı, bar-aý degen aǵaıyndarǵa «Aýrýy qıyn, shetelden maman kelip qaraıdy eken. Onyń qaraǵanyna, dári-dármegine kóp qarajat kerek eken degenmin. Qudań bolyp, basqalar bar – qudaı qalasa bir elý móshekteı kártóshki buıyryp, ony bir poıyzben kelisip tıep, aldaǵy aptada qalaǵa aparyp satyp keleıin dep turmyn. Onymen birge buıyrǵan tórt-bes iri qara, jıyrma shamasyndaǵy ýaq maldyń da etin aparmaqpyn» deıdi.
Ne kerek, óstip oılamaǵan jerden búk-shik bıznes paıda bolǵany…
Birde kelinshek alaqaılap kóńildi keldi de: «Endigi jerde el-jurtyń ne ákelse de ala ber. Stansadan kıosk ashtym, endi bár-bárin sata berýge bolady!» deıdi.
Qaıteıin, qoldan keler basqa tirlik joq, buıyrǵan bızneske bel sheship kiristim de kettim.
Sóıtip jatqanyma jylǵa jýyqtaǵanda áıel: «Endi seniń ornyńa men jatamyn. El-jurtqa ózim saýyqqan boldym, aýrýym áıelime juǵypty deısiń. Kıoskide satýshy bar, sen eki ortada júrip tursań boldy. Maǵan ne keregin ózim aıtamyn, tek ony aınalaıyn aǵaıyndarǵa kóz jasyńdy syǵymdaı otyryp aıtyp jetkizseń boldy» deıdi.
Ýaqytsha bolsa da qapas qamaýdan qutylǵanyma quldyq uryp, áıelge: «Lápaı taqsyr!» dep iske kiristim de kettim…
Ersultan MAǴJAN.
ALMATY.