Kommýnaldyq qyzmetke qatysty aqparattar, turǵyn úıdi jóndeý, aýmaqty tazartý, jaryqtandyrý jumystaryna jınalǵan qarajattyń qaıda, qalaı jumsalǵany týraly atyraýlyqtar endi ınternetten bile alady. Qalada «E-PIK» portaly iske qosyldy.
Pılottyq joba páter ıeleri kooperatıvteriniń de jumystaryn jeńildetedi. Burynǵydaı belgili bir sheshimdi qabyldaý úshin jurtty jınap jınalys ótkizip nemese ár páterdi aralap, jóndeý jumystarynyń bastalatyn ýaqytyn aıtyp ýaqyt shyǵyndamaıdy. Aqparat almasýdyń biryńǵaı platformasy arqyly bárin ınternettiń kómegimen júzege asyrýǵa bolady.
Atyraý qalasy ákimdigi baspasóz qyzmetiniń málimetine súıensek, oblys ortalyǵyndaǵy 71 PIK jáne basqarýshy kompanııalar «Atyraý-ashyq qala» portaly arqyly «E-PIK» baǵdarlamasymen jumys isteıdi.
-Bul joba turǵyndar men PIK, basqarýshy kompanııalar, kommýnaldyq qyzmetter men bılik organdary arasyndaǵy baılanysty nyǵaıtady. «Sıfrly Qazaqstan» baǵdarlamasy aıasynda biryńǵaı baılanys júıesi jasaldy, - deıdi aqparattyq tehnologııalar jáne memlekettik qyzmetterdi baqylaý bóliminiń basshysy Samat Embergen. – Portal kómegimen Atyraý qalasynyń ár turǵyny jeke shot ashyp, paıdalanýshyǵa tıesili úı týraly, kommýnaldyq qyzmetter týraly tolyq aqparat alady.
Qazirdiń ózinde «E-PIK» baǵdarlamasy boıynsha turǵyndardan 34 ótinim túsip, bári de óńdelgen. Portalda josparlanǵan jumystarmen tanysyp, turǵyndardyń pikir bildirýleri úshin de múmkindik qarastyrylǵan.
Baqytgúl BABASh,
«Egemen Qazaqstan»
ATYRAÝ