Semeı qalasynyń Zasıadko kóshesindegi №58 úıdiń turǵyndary telefon shalyp, muńdaryn shaqty. «1998 jyly salynǵan, 226 páteri, 600-ge jýyq turǵyny bar bizdiń úı Shoqan Ýálıhanov pen Zasıadko kósheleriniń qıylysynda ornalasqan. «Semeı avtobeketi» de osy mańda oryn tepken. Biz osy qalalyq avtobekette jalda bolǵan Sh.Ýálıhanov kóshesiniń jekemenshikke satylyp ketkenin estidik. Bul qalaı bolǵany? Qanshalyqty zańdy? Kelip, jaǵdaıymyzben tanyssańyz jaqsy bolar edi» dep ótinish jasaǵan soń Semeıge jol tarttyq.
Zasıadko kóshesindegi №58 úıdiń turǵyndarynan estip-bilgenimiz, Shoqan Ýálıhanov kóshesi qalanyń bas josparyna sáıkes jalpy qoldanystaǵy, ıaǵnı avtobýstar men avtokólikterdiń, adamdardyń erkin júrip-turýyna arnalǵan kóshe sanalady. Demek, satýǵa bolmaıdy. Osy máselege alańdaýshylyq bildirgen atalǵan kósheniń birneshe turǵyny Semeı qalalyq qoǵamdyq keńesiniń Turǵyn úı-kommýnaldyq sharýashylyq máseleleri jónindegi komıssııasynyń jetekshisi Nıkolaı Isaevqa hat joldap, qalalyq ákimdiktiń jer ýchaskesin jekemenshikke berý jónindegi qaýlysyn joıýǵa atsalysýyn suraǵandaryn aıtady. «Keńes zamanynda avtobekettiń aldynda jolaýshylardy otyrǵyzyp-mingizetin oryn bolatyn. Kósheden kólikter aǵylyp ótip jatatyn. Odaq taraǵannan keıin Zasıadko kóshesi men Aımaýytov kósheleri aralyǵyndaǵy Ýálıhanov kóshesi ýaqytsha «Semeı avtobeketi» JShS-ine jalǵa berilip, jekemenshik ıesi atalǵan kósheni temir qorshaýmen jaýyp alǵan bolatyn. Búginde atalǵan kóshe menshikke ótip, paıdalaný nysany «avtovokzalǵa qyzmet kórsetý úshin» dep ózgertilgen. Biz qala turǵyndarynyń ıgiligi úshin jumys istep turǵan jerdi bızneske aınaldyrýǵa qarsymyz. Kóshe ózimizge qaıtarylsyn» deıdi «Zasıadko» páter ıeleri kooperatıviniń jetekshisi Abylaı Turymbaev.
Semeıge barǵan kúni qalalyq ákimdikte qala ákiminiń orynbasary Nıkolaı Ýshakovtyń tóraǵalyǵymen shahardyń bas josparyna baılanysty qoǵamdyq tyńdaý ótip jatyr eken. Jıynda qalanyń bas josparyn jasaǵan «Grada» JShS-niń dırektory Árkenjan Mamedovke Semeı qalalyq qoǵamdyq keńesiniń Turǵyn úı-kommýnaldyq sharýashylyq máseleleri jónindegi komıssııasynyń jetekshisi Nıkolaı Isaev pen Zasıadko kóshesindegi №58 úıdiń turǵyndary zańsyz satylyp ketken Shoqan Ýálıhanov kóshesine qatysty suraq qoıdy. «Bas josparǵa sáıkes bul kóshe jalpy qoldanystaǵy, jurt emin-erkin júrip turatyn ashyq kóshe bolýy tıis. Kósheniń nege, qalaı satylyp ketkenin biz bilmeımiz. Oǵan jergilikti atqarýshy organdar zańdy túrde jaýap beredi» dedi ol.
Túıin:
О́zderi kúndelikti emin-erkin ótip júrgen kósheniń menshikke berilgenine qapaly turǵyndar bul máseleni Semeı qalasy ákimdigi tez arada retke keltirer dep úmit etip otyr.
Azamat QASYM,
«Egemen Qazaqstan»
SEMEI