Búginde elimizdegi bilim berý júıesin jańa mazmunda qurý, muǵalimderdiń biliktiligin arttyrý basty másele bolyp otyr. Osy oraıda, ásirese, óńirlerdegi ustazdardyń biliktiligine mán berý, sol arqyly olardy memleket tarapynan qoldaý joǵary deńgeıde júzege asyp otyrǵanyn da aıtyp ótý kerek.
Munyń bir dáleli, 2005 jyldan beri elimizdiń Bilim jáne ǵylym mınıstrliginiń uıymdastyrýymen ustazdar arasynda «Joǵary oqý ornynyń úzdik oqytýshysy» respýblıkalyq konkýrsy ótip keledi. Bul baıqaýdyń ótken jylǵy qorytyndysy boıynsha M.H.Dýlatı atyndaǵy Taraz memlekettik ýnıversıtetiniń 8 oqytýshysy «Joǵary oqý ornynyń úzdik oqytýshysy» ataǵyna ıe bolǵan edi.
Respýblıkalyq konkýrs jeńimpazdary qatysqan jıyn barysynda ýnıversıtet rektory Mahmetǵalı Sarybekov bul konkýrsqa respýblıkamyzdyń 80 joǵary oqý ornynan 481 úmitker qatysqanyn, nátıjesinde elimizdiń 43 joǵary oqý ornynan 200 adam «Joǵary oqý ornynyń úzdik oqytýshysy» ataǵynyń ıegeri atanǵanyn aıtyp ótti. Rektordyń aıtýynsha, konkýrs bastalǵaly beri ýnıversıtetten bul qurmetti ataqty 56 adam ıelengen eken. Al osy kúnge deıin ýnıversıtet tarıhynda birden 8 adam bul ataqqa tuńǵysh ret ıe bolǵan.
«Bul úshin tek jaqsy muǵalim bolý jetkiliksiz. Áýeli muǵalim jaqsy ádisker bolý kerek. Olardyń jazba oqýlyqtar daıyndaýǵa qabileti bolýy jáne mindetti túrde ǵylymı mektebi qalyptasqan ǵalym bolýy kerek. Sheteldiń joǵary oqý oryndarymen baılanysy bolý kerek. Búgingi tańda bizdiń ýnıversıtette 15 mamandyq boıynsha 3 tilde bilim beriledi. Iаǵnı, 47 muǵalim stýdentterge 3 tilde dáris beredi» dedi Mahmetǵalı Nurǵalıuly.
Búginde M.H.Dýlatı atyndaǵy Taraz memlekettik ýnıversıteti 64 sheteldik joǵary oqý ornymen kelisimshartqa qol qoıypty. Sonymen qatar, Portýgalııa memleketiniń joǵary oqý oryndarymen qosdıplomdy jobasyn da qolǵa alypty. Budan keıin ýnıversıtettiń munaı, gaz jáne mehanıka fakýlteti, «Mehanıka jáne mashına jasaý» kafedrasynyń professory, tehnıka ǵylymdarynyń doktory Saǵat Júnisbekov, «Munaı-gaz isi» kafedrasynyń professory, tehnıka ǵylymdarynyń doktory Isan Tilegenov, «Týrızm jáne servıs» kafedrasynyń dosenti, ekonomıka ǵylymdarynyń kandıdaty Altynaı Moldasheva, «Jeńil ónerkásip buıymdarynyń tehnologııasy men konstrýksııalaý jáne dızaın» kafedrasy dosentiniń mindetin atqarýshy, PhD doktory Bekjan Abzalbekuly jáne ózge de jeńimpaz oqytýshylar óz oılarymen bólisip, jýrnalısterdiń suraqtaryna jaýap berdi. Sonymen qatar, olar professor-oqytýshylar quramyn qoldaý maqsatynda ótken konkýrsta úmitkerlerdiń ǵylymı-pedagogıkalyq qyzmeti sapalyq jáne sandyq kórsetkishteri boıynsha baǵalanǵanyn, sertıfıkat pen tósbelgiden bólek, «Úzdik joǵary oqý oryndarynyń oqytýshylaryna» arnaıy grant berilgendigin, bul grant jeńimpazdarǵa álemniń jetekshi ýnıversıtetterinde ǵylymı-zertteý jumystaryn júrgizý men biliktiligin arttyrý maqsatynda taǵylymdamadan ótýge múmkindik beretindigin aıtyp ótti.
Hamıt ESAMAN,
«Egemen Qazaqstan»
Jambyl oblysy