Ulttyq ulan sarbazdary shyńdalyp jatyr

Batyrlyq baspaldaǵy

О́tken jyldyń mamyr aıynda áskerı mindetin atqara júrip, erlik pen batyrlyqtyń, uqyptylyq pen minsiz qyzmettiń úlgisin kór­setkeni úshin ulandyq birneshe ofıser Memleket basshysynyń Jarlyǵymen joǵary marapatqa ıe boldy. Olardyń qatarynda II dárejeli «Dańq» ordenimen Ulttyq ulan Bas qolbasshysynyń tárbıe jáne áleýmettik-quqyqtar jónindegi orynbasary general-maıor M.Satov, II dárejeli «Aıbyn» ordenimen 5573 áskerı bóliminiń komandıri polkovnık S.Shekarbekov, ushaq bortynda klınıkalyq ólim qursaýynda qalǵan jolaýshyny aman alyp qalǵany úshin Ulttyq ulan Bas qolbasshylyǵyndaǵy áskerı-medısına basqarmasynyń bas­tyǵy, medısına qyzmetiniń pol­kov­nıgi S.Omarbaev,  arnaıy opera­sııalarǵa  qatysqany úshin podpolkovnık E.Rodıkov marapattaldy.

«Erligi úshin» medali órtenip jatqan úı ishinen 4 adamdy qut­qarǵany úshin kishi serjant R.Eń­sepbaevqa, «Jaýyngerlik erligi úshin» medali Ulttyq ulan áskerı polısııa basqarmasynyń bastyǵy R.Qulymbetov pen qylmyskerden boıjetkenniń ómirin arashalaǵan 3660 áskerı bólimi komandıriniń TjÁQJ jónindegi orynbasary maıor T.Rahımovqa, 5570 áskerı bóli­miniń baılanys bastyǵy, kapıtan M.Balabekovke, 5516 áskerı bóliminiń vzvod komandıri, aǵa leıtenant D.Bektibaevqa, 5516 áskerı bólimi rota ko­man­dı­riniń orynbasary, aǵa leıte­nant I.Júsipovke, 5570 ás­ke­rı bóliminiń ofıseri, leıtenant E.Qýanarǵa, 5572 ás­kerı bóli­miniń aǵa mamany, efreı­tor B.Báı­te­re­kovke, sýǵa batyp bara jatqan adamdy qutqar­ǵany úshin Ulttyq ulan án-bı an­sambliniń aǵa mamany (konsertmeıster) D.Iаkovlevke tabys etildi. 

Sonymen qatar Prezıdent Jarlyǵymen «Shyǵys» О́ńirlik qolbasshylyǵynyń shtab bas­ty­ǵy, polkovnık Dmıtrıı Bocha­rov pen «Ortalyq» О́ńirlik qol­bas­shylyǵynyń shtab bastyǵy, pol­kovnık Ularbek Ábikeevke jo­ǵa­ry «general-maıor» sheni berildi.

Sondaı-aq bıyl Ulttyq ulan­nyń jedel maqsattaǵy bólim­shesiniń ádistemelik jáne jaýyn­gerlik daıarlyq ortalyǵynda alǵash ret (Almaty oblysynyń Zarechnyı aýylynda) barlyq ás­kerı bólim komandırleriniń oqý-ádistemelik jıyny ótti. «2018 – Kásibı biliktilik jyly» ataýyna saı uıymdastyrylǵan sharada komandalyq zveno ofıserleriniń kásibı biliktilikteri shyńdalyp, tájirıbe jınaqtady.

Mamandyq mártebesi mańyzdy

Otan qorǵaýshylar kúni qar­sańynda Parlament Senatynyń Halyqaralyq qatynastar, qorǵanys jáne qaýipsizdik ko­mı­tetiniń tóraıymy Darıǵa Nazar­baeva men Halyq qaharmany, tehnıka ǵylymdarynyń doktory, avıasııa general-leıtenanty Talǵat Musabaev jáne komıtet músheleri Muhtar Qul-Muhammed, Nurjan Nursıpatov jumys saparymen Soltústik Qazaqstan oblysynda boldy. Sapar aıasynda halyq qalaýlylary Ult­tyq ulannyń Áskerı ınstıtýty men aımaqtaǵy birqatar ás­kerı nysandy aralap, jaı-kúıimen tanysty. Senatorlarǵa ınstıtýttyń damý baǵyty men oqý ornynyń qyzmetkerleri úshin salynyp jatqan kóppáterli turǵyn úıdiń jáne ekinshi oqý ǵımaratynyń qurylysy týraly aıtyldy. Jıyn aıasynda sóz alǵan D.Nazarbaeva elimizdegi áskerı bilim berý salasynda Qazaqstan Respýblıkasynyń Áskerı doktrınasy basymdyqqa alynýy tıis ekendigin tilge tıek etti. Sonymen qatar alqaly jıynda ofıser-oqytýshylardyń biliktiligin kóterý ınstıtýtyn qurý men áskerı joǵary oqý oryndary úshin pedagog kadrlardy daıarlaýdyń múmkindikteri tal­qylandy. Ásirese, áskerı baǵyt­taǵy oqý oryndary osy kúnderi betpe-bet kezdesip otyrǵan keıbir máselelerge jiti nazar aýdardy.

– Kıberqaýipsizdik isimen aınalysatyn qorǵanys bólimsheleri bizdiń elimizde joǵary jalaqy tólenetin mártebeli mamandyq, abyroıy bıik mekemelerdiń sanatynan bolýy tıis. Olaı etpegen jaǵdaıda, bilikti mamandardy bul salaǵa tartý múmkin emes. Bul óte ózekti, ótkir másele. Osyǵan mu­qııat kóńil bólińizder, – dedi senator D.Nazarbaeva.

Yntymaqtastyq – eńbekti eseleıdi

О́tken jyly Astanaǵa Re­seı Federasııasy Federaldy qyz­met áskeri ulttyq gvardııasy dı­rek­torynyń – ulttyq gvardııa Bas qolbasshysynyń orynbasary general-polkovnık Sergeı Zaharkınniń jetekshiligimen arnaıy delegasııa qyzmettik saparmen keldi. Ekijaqty kezdesý aıasynda taraptar «Kobalt-2018» halyqaralyq oqý-jattyǵý jıy­nyn josparǵa saı uıymdas­ty­rylýy men oıdaǵydaı ótkizilýin jan-jaqty talqylap, ózara yn­ty­maqtastyqty nyǵaıtý joldary keńinen sóz boldy. Sonymen qatar salalyq vedomstvo ma­man­darynyń biliktiligin arttyra oty­ryp, mádenı-sporttyq árip­tes­tikti tereńdetý máselesi oń she­shim tapty.

Sondaı-aq ótken jyl­ǵy maý­symnyń ekinshi onkún­di­ginde Ult­tyq ulan Bas qolbas­shy­ly­ǵynyń basshylyq quramy Túr­kııa Respýblıkasyna resmı sapar­men bardy. Túrkııalyq árip­tes­­ter­diń arnaıy shaqyrýymen júzege asyrylǵan sapar maqsaty – jaýyngerlik qyzmet daıyndyǵy men ekijaqty salalyq baılanys­ty nyǵaıtý jolynda tájirıbe almasý edi.

Mamyr aıynda Ulttyq ulan­nyń arnaıy maqsattaǵy bólim­shesiniń jaýyngerlik jáne ádis­temelik daıyndyq ortalyǵy ba­za­synda UQShU arnaıy maqsat­taǵy Ujymdyq kúshteriniń «Ko­balt-2018» arnaıy ádiste­melik oqý-jattyǵýy ótti. Jıyn­ǵa UQShU múshe-memleket­teri­niń bólimsheleri: Armenııa Res­pýb­lıkasy Polısııasynyń je­tekshi quramy, Belarýs Res­pýb­lıkasy IIM ishki áskeri, Reseı Federasııasy ulttyq gvar­dııa­synyń Federaldy qyzmet áskeri, Reseı IIM, Qazaqstan Res­pýb­lıkasynyń Ulttyq ulany, IIM jáne Qyrǵyz Respýb­lı­kasy men Tájikstan Respýb­lıka­sy­nyń bólimsheleri qatys­ty. Ha­lyqaralyq deńgeıde uıym­das­tyrylǵan oqý-jattyǵý jıy­ny zańsyz qarýlaný úderisin joıý­ǵa baǵyttalǵan bolatyn. Son­dyq­tan da aýqymdy sharaǵa 700-den astam áskerı qyzmetshi qa­tys­tyrylyp, 70 jaýyngerlik jáne ar­naıy tehnıkalar men 5 áýe teh­nıkasy jumyldyryldy. 500 bir­likten astam artıllerııalyq jáne atys qarýymen qatar, barlaý maqsatynda ushqyshsyz ushý apparattary da sheber paıdalanyldy. Sóıtip joǵary deńgeıde uıymdastyrylǵan ujymdyq kúsh­ter áskerleri ózderiniń jaýyn­gerlik sheberlikteri men kásibı biliktilikterin pash etti. Bul týraly sharanyń jabylý saltanatynda sóz alǵan UQShU bas hatshysy general-polkovnık Iýrıı Hachatýrovtyń ózi de aıtty.

– «Kobalt-2018» arnaıy ádistemelik oqý-jattyǵýy aıasynda terrorıstik uıymdarǵa qarsy kúres júrgizýge baǵyttalǵan orasan zor jaýyngerlik daıarlyq jumystary júzege asyryldy. Osyndaı birlesken oqý-jattyǵý jıyndary Ujymǵa múshe memle­ketter áskeri úshin qashanda qa­jet. Al bul sharaǵa Qazaqstan Res­pýb­lıkasynyń Ulttyq ulany men onyń jetekshi qurylymy óte zor da­ıyndyqpen kelip, muqııat ja­­ýap­­kershilikpen sátti ótkizdi, – dedi.

Búginde UQShU aldyna qoıyl­ǵan birqatar mindetterdi sheshýde zor múmkindikterge ıe. Osy kezge deıin atqarylǵan is-sharalarda da atalǵan uıym óziniń abyro­ıyn asqaqtatyp, aımaqtyq qury­lymdardyń tıimdiligin arttyrýy nátıjesinde áriptester arasynda senimdi seriktestik ornap, ózara yntymaqtastyq nyǵaıa tústi.

Jańa ushaq – baǵyndyrǵan bir beles

Byltyrǵy qyrkúıek aıynda «Qazaqstannyń avıasııalyq ın­dýstrııasy» JShS-niń Astana­daǵy bazasynda Ulttyq ulan óz menshigine Qytaıdan satyp al­ǵan sý jańa Y8F200W ás­ke­­rı-kólik ushaǵynyń tanys­ty­ry­­­ly­myn ótkizdi. Jańa tehnı­ka­­nyń tanystyrylymyna Ishki is­­ter mınıstri Q.Qasymov pen bu­­rynǵy Qorǵanys jáne aeroǵa­rysh ónerkásibi mınıstri B.Atam­qu­lov, «AVIC» kompanııasy Bas dı­rek­torynyń orynbasary – bas eko­no­mı­si Vang Djıan, Qytaıdyń Qa­zaq­standaǵy Tótenshe jáne óki­let­­ti el­shisi Chjan Sıao men memle­ket já­ne qoǵam qaıratkerleri qa­tys­ty.

Kópmaqsatty paıdalanýǵa ar­nal­ǵan Y8F200W ushaǵy uzaq já­ne orta qashyqtyqta usha alady ári áskerıler men áskerı tehnıkalardy tasymaldaýǵa arnalǵan. Sondaı-aq bul ushaq topyraqty tegis jerde kúnde de, túnde de ushyp-qoný múmkindigine ıe jáne -50°C pen +50°C aýa temperatýrasynda qalypty jaǵdaıda jumys isteı alady. Búginde Ulttyq ulannyń áýe parkinde An-74, An-26 ushaǵy men Mı-171E tikushaǵy bar. Onyń ústine ótken jyly biz úshin eleýli oqıǵalardyń biri – Ulttyq ulannyń áýe eskadrılıasy Almatydan Astana qalasyna qonys aýdarýy boldy. Bul endigi jerde bizdiń ushaqtarymyz baıtaq Qazaqstannyń kez kelgen núktesine qysqa merzim ishinde janarmaı quıýdy qajet etpeı-aq ushyp jetedi degen sóz.

Rýslan JAQSYLYQOV,

Ulttyq ulannyń Bas qolbasshysy, general-leıtenant