Endi Taldyqorǵan qalasynyń áýejaıynan elordasy Astanaǵa aspan joly arqyly qatynaıtyn jolaýshylar sý jańa ushaqqa minetin boldy. Búgin «Jetisý» áýekompanııasynyń ushaq qory eki birdeı jańa áýe kemesimen tolyqty.
Chehııada qurastyrylǵan «L-410» markaly ushaq jaqyn qashyqtyqtaǵy áýe saparyna shyǵýǵa arnalǵan, jolaýshylar sany da ishki reısterge shaqtalǵan zamanaýı tehnıka sanatynda. «Jetisý» áýe kompanııasy bul ushaqtardy satyp alýǵa «Nurly jol» memlekettik baǵdarlamasy aıasynda qol jetkizdi.
- Almaty oblysy Jańa jyldy ıgi jańalyqpen bastady. Jaqynda ǵana Talǵar aýdanynda demalys orynyn ashyp, óńir turǵyndarynyń demalýyna, sportpen shuǵyldanýyna jaǵdaı jasadyq. Bul - ishki týrızmdi damytýǵa baǵyttalǵan shara. Búgin Taldyqorǵan áýejaıyna kelip qonǵan jańa ushaqtar da osy maqsatqa qyzmet etetin bolady. Qazir Astanaǵa sapar shegetin jolaýshylar sany artty. Sondaı-aq, Alakól jaǵalaýyna demalý úshin keletin týrıster legi kóbeıdi. Endi olardyń áýe joly arqyly kelýine jaǵdaı jasaýymyz kerek. Bul bizdiń aldymyzǵa Memleket Basshysy Nursultan Nazarbaev júktegen mindet bolatyn, - deıdi oblys ákimi Amandyq Batalov.
Aıtpaqshy, bul on toǵyz jolaýshyǵa arnalǵan «L-410» ushaqtary «Jetisý» áýe kompanııasynyń qurylǵaly beri satyp alǵan alǵashqy jańa tehnıkasy eken. Eki ushaqtyń biri Taldyqorǵan – Astana – Taldyqorǵan baǵytynda jolaýshylar tasysa, ekinshisi Alakól jaǵalaýyna, Taldyqorǵan – Úsharal – Taldyqorǵan baǵyty boıynsha qyzmet kórsetpek.
Qalmahanbet MUQAMETQALI,
«Egemen Qazaqstan»
Taldyqorǵan qalasy