Qazaqtyń tuńǵysh kásibı ıllıýzıonısi, kórnekti estrada-sırk ártisi, Qazaqstannyń Halyq ártisi Sara Oqapqyzy Qabıǵojına dúnıeden ótti, dep habarlaıdy Mádenıet jáne sport mınıstrliginiń baspasóz qyzmeti.
Arystanbek Muxamedıuly Sara Qabıǵojınanyń qaıtys bolýyna baılanysty marqumnyń otbasyna, týystary men jaqyndaryna kóńil aıtty.
«Sara Oqapqyzynyń elimizdiń óneri men mádenıetiniń damýyna sińirgen eńbegi zor. Sańlaq kúıshi-dombyrashy Oqap Qabıǵojınniń qyzy Sara ápkemiz ónerge bala kezden qushtar bolyp ósti. Almatyda 1965 jyly ashylǵan respýblıkalyq estrada-sırk stýdııasynyń tuńǵysh túlegi. Kásibı saxnadaǵy óner jolyn «Qazaqkonsertte» kórkemsóz oqý sheberi retinde bastady. О́mir men ónerde serigi bolǵan Sultanǵalı Shúkirovpen birge, qazaq saxnasynda sırek kezdesetin kózbaılaýshy-ıllıýzıonıstik janrda óner kórsetti. Elimizdiń estrada-sırk ónerine ólsheýsiz eńbek sińirgen, aıaýly tulǵa Sara Qabıǵojınanyń shyǵarmashylyq joly men jarqyn beınesi el jadynda saqtalary sózsiz», dedi mınıstr.
Sara Oqapqyzy 1972 jyly Máskeýdegi estrada óneriniń búkilodaqtyq shyǵarmashylyq sheberhanasynda oqyǵan. 1978 jyly Karlovy Vary, keıin Parıjde, Brıýsselde ótken dúnıejúzilik ıllıýzıonıstter baıqaýlarynda Bas júldeni jeńip alǵan. Sondaı-aq, Gavanada ótken (1978) Jastar men stýdentterdiń búkil dúnıejúzilik 11-festıvaliniń jáne Búkilodaqtyq Komsomol syılyǵynyń ıegeri (1980) atanǵan.