AQSh-tyń Kalıfornııa shtatyndaǵy Santa-Ines qalasynda qazaqstandyq eki kásipqoı boksshy Madııar Áshkeev pen Meıirim Nursultanov ózderiniń kezekti jekpe-jekterin ótkizip, ekeýi de jeńiske jetti.
Birinshi bolyp sharshy alańǵa Meıirim Nursultanov shyqty. Segiz raýndqa josparlanǵan kezdesýde Nursultanov meksıkalyq Ramon Agýnagamen judyryqtasyp, jekpe-jektiń ekinshi raýndynda qarsylasyn sulatyp saldy. Osylaısha, Meıirim kásipqoı bokstaǵy onynshy jeńisine qol jetkizdi.
Al atalǵan boks keshiniń basty jekpe-jegine shyqqan Madııar Áshkeev pýertorıkalyq Lýıs Ernandespen kezdesti. Eki boksshy da josparlanǵan 10 raýndty tolyq judyryqtasyp, tóreshilerdiń sheshimi boıynsha otandasymyz biraýyzdan jeńiske jetti. Bul – Madııardyń kásipqoı bokstaǵy 11-shi jeńisi.
Álı BITО́RE,
«Egemen Qazaqstan»