AQSh Prezıdenti Donald Tramp týıtterdegi paraqshasyna Túrkııaǵa qatysty pikir bildirdi. Aq úı basshysy Ankara tarapy kúrdterge tıisse, bul elge ekonomıkalyq qysym jasaıtynyn málimdedi. D.Tramtyń pikiri áleýmettik jeliler men álemdik buqaralyq aqparat quraldarynda qyzý talqyǵa tústi.
Aq úı basshysy óz málimdemesinde AQSh-tyń Sırııa terrıtorııasynan shyǵý prosesin bastaǵanyn jetkizip, terrorıster qaıta bas kóterse, olardy joıyp jiberýge ázir ekenin jazǵan.
«Kópten kútken AQSh áskerin elge qaıtarý jumysyn bastap kettik. Alaıda ILIM/DAISh-tyń qaramaǵyndaǵy shaǵyn aımaqtarǵa shabýyl jasaýdy toqtatpaımyz. Eger olar qaıta boı kóterse, jaqyn mańda qalǵan bazalardan shabýyl jasaımyz. Túrikter kúrdterge tıisetin bolsa, ekonomıkasyn qıratyp jiberemiz. 20 shaqyrymdyq qaýipsiz aımaq quryńdar...» dep jazdy D.Tramp.
Kóp uzamaı AQSh prezıdenti kelesi jazbasynda «Basqasha aıtqanda, kúrdterdiń Túrkııany arandatýyn qalamaımyz. Reseı, Iran jáne Sırııa tarapy AQSh-tyń dushpany – ILIM/DAISh uıymyn joıý jolyndaǵy uzaq merzimdi áriptesi retinde paıda kórdi. Bul biz úshin de paıdaly, biraq áskerimizdi elge qaıtaratyn kez keldi. Toqtaýsyz soǵysqa núkte qoıýymyz kerek» dep jazdy.
CNN arnasynyń habarlaýynsha, D.Tramptyń bul sózderi Taıaý Shyǵystaǵy terrorıstermen kúres barysynda áriptes bola bilgen elge baǵyttalǵan jaǵymsyz pikir. Bir jaǵynan, Túrkııa óńirdegi kúrd toptaryn terrorıstik uıym retinde sanaıdy. Al AQSh-tyń Sırııada áreket etip jatqan áriptes toptarynyń basym bóligi kúrdterden quralǵan.
Al Jazeera agenttiginiń habarlaýynsha, Ankara bıligi buǵan deıin AQSh tarapyn Kúrd halqyn qorǵaý uıymymen (YPG) áriptestik ornatqany úshin aıyptap kelgen-di. О́ıtkeni Túrkııa bıligi atalǵan uıymdy, sondaı-aq Kúrdterdiń demokratııalyq uıymy partııasyn (PYD) Anadolyda tyıym salynǵan top - Kúrdistan jumysshylar partııasymen (PKK) baılanysy bar dep kúdiktenedi. Sondyqtan joǵaryda atalǵan uıymdardy da Túrkııa bıligi terrorıstik toptar qataryna jatqyzady.
О́z kezeginde Túrkııa dıplomattary da qarap qalǵan joq. Anadolu ajans aqparattyq agenttiginiń málimetine saı, Túrkııa prezıdentiniń baspasóz hatshysy Ibrahım Kalyn AQSh prezıdentiniń týıtterine jaýap jazǵan.
«Qurmetti Donald Tramp, terrorıster seriktesterińiz ben odaqtastaryńyz bola almaıdy. Túrkııa AQSh-tan strategııalyq seriktestik mindetterin oryndaýyn jáne áriptestiktiń terror propagandasymen bylǵanbaýyn kútedi» dedi I.Kalyn.
Sonymen qatar I.Kalyn AQSh prezıdentine bergen jaýabynda sırııalyq kúrdter men PKK uıymyn teńestirmeýge shaqyrdy. Onyń pikirinshe, PYD men YPG toptary PKK uıymymen baılanysy bar. «Túrkııa kúrdtermen emes, terrorıstermen kúresedi. Biz kúrdter men basqa da sırııalyqtardy terror qaýpinen qorǵaımyz» dedi I.Kalyn týıtterdegi jazbasynda.
Budan bólek Túrkııanyń Syrtqy ister mınıstri Mevlıýt Chavýshoǵly Lıýksembýrgte ótken Syrtqy ister jáne Eýropa mınıstri Jan Asselbornmen birlesken baspasóz jıynynda D.Tramptyń málimdemesine baılanysty óz oıyn bildirdi.
«Strategııalyq seriktestik áleýmettik jelide talqylanbaıdy. Biz talqyǵa ashyqpyz. Donald Tramp Túrkııa memleket basshysyna habarlasyp, Sırııadan ketetinin jáne muny Túrkııanyń úılestirýimen iske asyrmaq oıyn aıtqan bolatyn. Eki kún buryn AQSh Syrtqy ister mınıstri Maık Pompeomen telefonmen sóıleskende bul máseleni talqyladyq» dedi M.Chavýshoǵly.
Odan bólek, Sırııa ońtústigine 30 shaqyrymdyq qaýipsiz aımaq qurý ıdeıasy AQSh-tyń emes, Túrkııa prezıdenti Erdoǵannyń bastamasy ekenin de aıtyp ótti. Jýrnalısterge bergen suhbatynda M.Chavýshoǵly mundaı eskertpelerden Túrkııa tarapy qoryqpaıtynyn jetkizdi. Sondaı-aq mańyzdy máseleni áleýmettik jelide emes, ekijaqty kelissóz barysynda aıtylýy qajet ekenin atap ótti.
Svetlana ǴALYMJANQYZY,
«Egemen Qazaqstan»