Ǵasyrlar boıy halyqpen birge jasasyp kele jatqan dástúrli án óneri túrlengen jańasha formatta kórermenge jol tartty. Jıyny 17 konsertten quralǵan mýzykalyq jobanyń maqsaty – dástúrli ónerdiń qaımaǵy sanalatyn án qazynasymen tyńdarmandy etene qaýyshtyrý.
«Uly dala sazy» atty jobanyń tanystyrylymyna «Qazaqstan» teleradıokorporasııasynyń basqarma tóraǵasy Erlan Qarın, Qazaqstannyń eńbek sińirgen qaıratkerleri termeshi Aıgúl Elshibaeva, ánshi Erlan Rysqalı, kúıshi Janǵalı Júzbaı qatysty.
«Elbasynyń «Uly dalanyń jeti qyry» maqalasynda ulttyq qundylyqtardy zamanaýı turǵyda dáripteý máselesi kóterildi. Bizdiń maqsatymyz – Elbasy maqalasyndaǵy kóterilgen ıdeıalardy júzege asyrý. Osy turǵyda ulttyq arna tól ónerdi jańasha nasıhattaý maqsatynda televızııalyq jobany iske asyrdy. Atalǵan jobanyń maqsaty – dástúrli mýzykany ulyqtaýmen qatar, osy salada júrgen ónerpazdardyń basyn qosý. Konsertte búginde umytylyp bara jatqan halyq ánderi men qazaq kompozıtorlarynyń shyǵarmalary oryndalady», dedi «Qazaqstan» teleradıokorporasııasynyń basqarma tóraǵasy Erlan Qarın OKQ-da ótken baspasóz máslıhatynda.
Mýzykalyq joba ulttyq arna efırinen 13 qańtardan bastap aptasyna bir ret kórsetiledi. Túsirilim jumystary 2018 jyldyń qarasha aıynda bastalǵan jobaǵa toqsannan astam ónerpaz qatysqan. Olardyń arasynda Seken Turysbekov, Qajybek Bekbosynov, Ramazan Stamǵazıev, Sáýle Janpeıisova syndy óner maıtalmandary bar. Bul rette ánshi Erlan Rysqalı atalǵan jobanyń ult rýhanııatyna bereri mol baǵdarlama ekenin atap ótti. Qazaqtyń keleshegi sheri men shattyǵyn qaq bólisken qara dombyrasynyń shanaǵyna baılanǵan. Bizdiń kindigimiz osydan úzilmeýi kerek. Álemdi aralap júrgen ónerpaz retinde men óner shekara, ult, jas talǵamaıtynyn senimmen aıta alamyn», dedi ánshi Erlan Rysqalı. Eń bastysy joba barysynda jazyp alynǵan 177 shyǵarma «Qazaqstan» ulttyq arnasynyń «Altyn qoryna» enetin bolady.
Aıa О́MIRTAI,
«Egemen Qazaqstan»